盲反派開恆Turbo反對《逃犯條例》，甚至不惜飛去外國投訴特區政府，明眼人一睇，都知道佢哋見炒作「兩地」議題對自己有幫助，所以咩「政治犯」、「經濟犯」甚至「假罪犯」統統搬晒出嚟啦；囍雨今日睇報紙，見到有報道話鄭若驊就事件作出解說，但就「被轟不熟刑法」。當囍雨喺度諗邊個「權威人士」話律政司司長鄭若驊「唔識嘢」嘅時候，哦，原來係公民黨郭榮鏗同楊岳橋喺度「發炮」；老實講，當盲反派政客或者大律師去話一個資深大律師「唔熟書」嘅時候，大家或者只能苦笑，係係係，公民黨先係法律「權威」嘛！但係睇埋佢哋嘅論據，好似佢哋係有睇過人哋個案點講囉！

資深大律師都唔熟刑法？

老實講，囍雨睇到《生果報》相關報道嘅標題嘅時候，確實係好驚訝，因為鄭若驊作為律政司司長、資深大律師仲要做過法官，究竟邊個咁有份量話佢「唔熟書」呀？當囍雨張篇報道睇到落底嘅時候，原來係公民黨立法會議員兼大律師楊岳橋同郭榮鏗向鄭若驊「發炮」，楊岳橋就話政府「講大話」，話法庭受制於法例限制，唔會考慮被告提出證明自己無罪的反證，只要控方符合表證成立要求就會發出拘押令，「被告在聆訊過程中，抗辯空間非常有限」；郭榮鏗講得仲「盡」，直頭話鄭若驊唔熟刑事法，批評佢「唔熟書亂咁噏」。言下之意，就係鄭若驊「唔識嘢」，佢哋講先啱啦！

囍雨理解楊岳橋一番說話，大意就係法庭做嘅嘢好少，而或被移交人士嘅抗辯空間亦「有限」，但囍雨睇番鄭若驊嘅說法，鄭若驊講到明可能被移交嘅人有權請律師，喺法庭作出申請和主張，法庭要睇兩邊陳述，而且可以決定申請移交唔成立；喺過程中，法庭亦絕對可以睇文件等等。其實喺《普通法》裡面抗辯權嘅保障下，法庭絕對有足夠權限審議移交個案，到底真正唔熟書嘅係邊個呢？

盲反派先係權威

近年有個好有趣嘅現象，就係但凡講到任何具爭議性嘅法律或者立法事宜，盲反派都會擺出一副「我哋先係法律權威」嘅模樣，然後質疑政府種種建議，最明顯嘅例子就係高鐵「一地兩檢」方案同《國歌法》立法工作；但當盲反派「行過高鐵站附近會畀國安人員用高鐵捉番內地」嘅謊言被事實所戳破之後，大家係咪仲要信呢啲政客呢？佢哋的確係權威，不過只係專搞破壞、毫無理性嘅「權威」！

 圖片來源:RTHK