之前公民黨立法會議員楊岳橋提出有關單程證嘅議案，但到立法會討論議案嘅時候，佢自己就匿埋喺辦公室「睇電視」，搞到議案「自動流產」，佢就算向公眾道歉，結果都係畀人鬧爆，話佢所謂「關鍵一席」，原來只係「關鍵缺席」；事隔一輪，就輪到會計界議員梁繼昌「甩轆」，自己提出草案竟然自己唔喺度搞到議案「流產」。盲反派平時成日反對呢樣、果樣，到自己提出草案或者議案嘅時候又唔喺度，究竟佢哋係咪議事架？

提出草案 但玩失蹤

根據傳媒報道，立法會原本噚日審議由梁繼昌提出嘅《2018年專業會計師（修訂）條例草案》，但梁繼昌就玩失蹤，令到草案唔能夠處理，梁繼昌初時就「死撐」話自己喺會議廳，不過根據立法會嘅錄影片段，佢當時的確係唔喺位（另有報道指佢話自己拉緊票）；之後梁繼昌又改口話自己缺席係「臨時策略」，原因係佢「唔夠票」，需要更多時間游說各黨議員支持，仲話實在係「情非得已」，叫大家原諒佢喎。講咁多嘢，廣男剩係想問一句，開會係咪一個議員嘅基本責任先？又或者，自己提出咗草案，係咪至少自己都要在場呢？

老實講，夠唔夠票、其他黨派支唔支持都好，就自己提出嘅議案、草案出席番會議，呢啲基本上係必要嘅責任，梁繼昌做咗咁耐立法會議員，「拉票」要拉到連人都唔知去咗邊，會唔會過分咗啲呢？之前楊岳橋嚟一次「關鍵缺席」，而家梁繼昌又嚟多次，即係提出議案、草案前，就宣揚自己會做咩、點做，到開會果時就人都唔見埋，廣男實在懷疑，盲反派班議員喺議會除咗搞反對、抗爭之外，基本上係乜都唔識做！

你還相信他們？

有啲人講笑話，盲反派就算點「甩轆」，到下次選舉嘅時候，繼續會話自己嘅議席有幾「關鍵」，甚至話香港嘅情況有幾「危急」，呼籲支持者一定要票投佢哋，而支持者亦會「含淚」投票保住佢哋議席；但佢哋往後會繼續「甩轆」，如是者不斷循環！廣男就喺度諗，當盲反派嘅「關鍵缺席」行為變得「恆常化」，連議員基本責任都做唔到嘅時候，盲反派支持者真係要諗下，下次仲含唔含淚投票畀佢哋喇。

圖片來源: RTHK