自從民主黨出現林子健嘅「釘書釘」事件以及許智峯喺立法會強搶女EO手機後，廣男就越嚟越鍾意留意民主黨，當大家以為佢哋對住建制派、政府以及中央先係咁嘅時候，又錯喇，因為佢哋封殺自己人一樣「不遺餘力」。日前廣男睇新聞，見到黃大仙議員譚香文有意捧自己助理去選黃大仙鳳凰選區，點知畀「民主動力」拖延同耍咗一輪先發現個位「協調」咗畀民主黨人去「發展」，仲要「民主動力」畀傳媒踢爆咗之後先回覆當事人。嘩，服務社區要向「民主動力」攞「專營權」都算啦，仲要「忙咗」一段時間都唔覆人當人透明，大家話所謂「民主派」，到底有幾「民主」呢？真係「沒有最荒謬，只有更荒謬」。

已讀不回的盲反派

譚香文想推自己助理鄭詩陶出嚟「服務」社區，鄭詩陶本來已經按機制向「民主動力」召集人、民主黨趙家賢報名，但對方一直「已讀不回」，民主黨今年初仲開始有人喺該區宣傳，趙家賢就日前畀傳媒踢爆件事，先至回覆鄭詩陶，一時聲稱果區由其他人做聯絡、當區議員無諗住退，一時又稱「民主動力」已經同七個議員開會，一致決定畀民主黨代表去「發展鳳凰選區」（入面有三個係民主黨人）。簡單嚟講，就係所謂「民主動力」嘅協調機制，無乜大政黨背景嘅人想「搶位」去服務社區，好難囉！

呢件事反映咗盲反派、「民主動力」甚至民主黨一個好重要嘅問題，就係盲反派唔係口口聲聲講民主嘅咩，乜幾個人「圍威喂」傾下，就決定邊個人可以去服務某個社區架喇，透明咩？公道咩？仲要自己傾完有結果連覆都唔回覆人，即係而家一班盲反派大哥大姐話完人，如果唔係傳媒查詢連回覆當事人都懶，有冇咁惡呀？呢啲行為，根本就係「反民主」，「民主派」喎。

又係民主黨！

民主黨喺呢件事上面，除咗趙家賢本身係民主黨人之外，「民主動力」所謂嘅協調機制，入面原來咁多都係民主黨人，咁即係邊個選好大程度上又係民主黨人話事；廣男覺得鄭詩陶非常慘，慘在佢唔係民主黨或者「民主動力」嘅自己人，所以被排除喺所謂機制之外仲要冇人理佢。不過唔緊要，服務社區從來都唔需要攞「專營權」，如果想同民主黨呢班所謂「民主衛士」爭過，就Go Ahead吧！

原圖：「民主動力」facebook