盲反派為咗反對《逃犯條例》修訂，可謂係無所不用其極，遊行、寫文甚至飛埋去美國搵「外國勢力」投訴；繼前政務司司長陳方安生、立法會議員郭榮鏗以及莫乃光去完一轉「唱衰香港」嘅美國之旅後，今日又有報道指民主黨創黨主席李柱銘等人將會喺今個月內訪美，要「着力由對美國行政機關具相當影響力的國會層面入手，冀藉此讓美國政商界了解修例的殺傷力，從而發聲施壓並迫使港府撤回草案」。香港特區政府要修例，李柱銘等人去搵外國施壓，呢啲算唔算係「通敵」呢？

盲反派「引清兵入關」？

中美之間嘅貿易戰陰晴不定，正常人都知道美國想壓制正在崛起、甚至有望超越美國嘅中國，而香港作為國家重要嘅一部分，美國借香港嚟搞中央真係一啲都唔出奇；偏偏盲反派就要當自己國家係「仇人」，反而屢屢到美國唱衰香港、內地，企喺美國一邊。今日囍雨睇到李柱銘等人有意繼陳方安生等人後再度訪美，腦海入面諗到嘅一句說話，就係「引清兵入關」！

盲反派人士或者認為，如果美國以更新美港政策法為由向香港特區政府施壓，咁樣就有望令港府擱置《逃犯條例》修訂，囍雨覺得咁荒謬，因為特區政府要做嘢，如果盲反派搵美國干預，特區政府就更加要企硬；其次就係修例本身就係為咗公義，無理由因為盲反派反對甚至搵外國施壓就擱置；第三，亦都係最重要嘅，就係盲反派有意無意攞美港政策法出嚟講，佢哋心底入面係咪好想美國抵制香港呢？

中央不能干預香港 但美國可以？

呢件事反映出，盲反派做事確實好矛盾，當對香港有直接管轄權嘅中央發聲嘅時候，盲反派就大大聲話喺「一國兩制」之下中央唔應該「出聲」或者干預，但喺另一邊廂呢，「外國勢力」諸如英、美就可以對香港事務指手劃腳架喎，呢個究竟係咩道理？即係自己國家嘅中央政府就唔應該發聲或者發出指示，但盲反派就好歡迎外國干預香港事務？香港多得有李柱銘呢班盲反派，佢哋總會喺關鍵時候，打開「外國勢力」干預香港嘅「大門」。

圖片來源: 文匯報