民主黨立法會議員林卓廷為咗炒作「UGL事件」，搭個台、搞個「天下為公」出嚟向公眾籌錢政治抹黑前特首梁振英；佢哋最新動作，就係搵咗社民連曾健成（下稱阿牛）做爛頭卒，提出司法覆核挑戰律政司唔起訴梁振英同立法會議員周浩鼎嘅決定，佢哋噚日仲有片擺上社交平台講解事情嘅「最新狀況」；但廣男睇阿牛講嘅嘢，好似完全唔知發生緊咩事咁，對UGL入面一啲已知嘅事實完全扭曲晒，廣男想講，就算係臨時演員都係演員啦，阿牛就算要做人隻「政治卒」，係咪都應該專業啲，唔好咁求其呢？

搞錯事實 貽笑大方

呢條由林卓廷等人上載到社交平台、題為〈UGL案新進展 四月三日高院見〉嘅短片，「主角」林卓廷化身為「配角」，訪問「主角」阿牛點解肯參與「天下為公」，阿牛就話自己可能傾家蕩產，但質疑點解梁振英唔駛申報同UGL協議而得到嘅款項，又拉埋沙中線超支嚟講；廣男想講，其實阿牛所講嘅問題，律政司以至梁振英本人都解說過到底係咩事，阿牛好似乜都唔知咁，佢可能畀人利用咗都唔知！

例如阿牛話梁振英唔駛申報因UGL協議而產生嘅款項，其實律政司聲明已經講過，「至於沒有向有關當局申報利益的指控，由於梁振英沒有利益衝突，因此沒有法律規定需要申報他在成為行政長官之前，與UGL所簽訂協議而會獲得款項的金額」；又或者沙中線問題，廣男估計阿牛係講緊有份接沙中線工程嘅禮頓係同UGL同屬CIMIC集團啦，但係梁振英自2013年12月「離職協議」完結後已經同UGL「完全冇關係」，而CIMIC喺2016年先成為UGL嘅大股東，即係就算點計，梁振英同有承接沙中線工程嘅禮頓都無交集過，沙中線超支關梁振英咩事呢？呢啲嘢係阿牛唔知，定係林卓廷無講畀佢知，畀個「氹」佢踩？

林卓廷化身「花生友」

對於林卓廷所謂同阿牛合作一事，廣男覺得林卓廷確係「精」，明知輸官司可能會「傾家蕩產」，於是同班「黨羽」就搵阿牛出嚟「頂」，自己就好似做咗「花生友」咁。不過，無論佢哋搞「天下為公」好，甚至搵「替死鬼」提出司法覆核都好，一樣唔可以改變一個事實，就係「UGL事件」係經廉署「翻遍石頭」嘅仔細調查、律政司檢視證據以及極具權威性嘅審查貪污舉報諮詢委員會作最後決定Close File，佢哋搞司法覆核，或者可以藉機達至「變相審訊」嘅效果，但佢哋想將一個人由無罪變「有罪」，根本只係借法庭嚟玩攻訐，政治抹黑梁振英嘅骯髒手段！

圖片來源: RTHK