人大常委會定咗2017普選既框架後，「佔中」發起人隨即就宣布「佔中」既對抗策略失敗，不過幾個學生組織就唔係咁諗喇，立刻跳出嚟話唔收貨，學聯專心喺大專搞罷課，而學民呢？梗係做最「拿手」既 – 煽動未成年中學生啦！

對大專生嚟講，罷課其實唔大問題。始終大專學生大部份都係成年人，只要肯承擔法律同道德責任，真係理得你做乜吖；但中學生就唔同喇，喂，佢哋絕大部份都未成年，雖然學民講到冠冕堂皇，話事件涉及中學生既未來啫，但講到底，社會係唔係真係想未成年人士咁快畀人捲入醜陋既政治鬥爭先？

況且，都未計普選議題其實係社會極之分化，學民叫中學生罷課時，唔知有冇將異見人士既意見都講埋出嚟呢？

事實上，睇返學民今日上載既宣傳罷課單張，唔少內容都係誤導，而且仲好無稽。學民仲鍾意咬文嚼字，就同你逐點數有乜問題。

首先，學民話，人大常委會既決定，令到將來參選特首既，只會係「愛國愛黨」人士，學生係喺為勢所逼下先將行動升級。「愛國愛黨」？Sorry，唔係咁囉，中央一直只係要求特首愛國愛港，同埋唔可以同中央對抗，學民自己加「愛黨」呢個條件出嚟，到底有乜居心？

問心，要一個城市既領導人「愛國」，到底有乜問題先？乜唔係基本條件嚟既咩？學民特登抽空呢個概念，將「愛國」變成特殊條件咁講，好明顯就係混淆視聽啦。再者，查實而家連提名委員會既組成係點都未傾，研究都唔研究就罷課，試問咁又點叫「為勢所逼」呀？話你未埋檯就「片」人兩刀就差唔多！

第二，將學生既責任同關心社會拉向對立面。學民話：你選擇應付排山倒海既TEST同QUIZ……期望著JUPAS爆分兼入U讀神科……還是選擇關心政改，甚至罷課。真心想問一句，乜讀好書入到好既大學學科唔係學生責任嚟架咩？如果係既話，學民做乜要將佢同「關心社會」對立起嚟呀？讀好書、上足堂就唔可以關心社會？讀完書喺工作崗位上就唔可以關心政制？兩件事冇牴觸架，學民好誤導囉！

再者，罷課係乜意思呢？係要求中學生唔返學校，去到某個廣場上堂？學民，真心再問一句，唔返學校上堂，而要中學生走咗去廣場，如果有意外邊個負責？你負擔得起咩？你肯定唔會有混亂場面？學民自己示威都成日衝擊啦，如果班學生跟你去衝之後受傷，甚至只係做旁觀者但誤中副車受傷，咁點？你答咗所有中學生同家長先啦！

最後，學民話「罷課」成本較低，又可以對社會秩序造成一定衝擊喎。先唔講衝擊社會秩序有乜負面後果，乜罷課真係「成本較低」咩？唔係囉！各位中學同學仔，如果你哋考慮緊罷唔罷課既話，唔該都諗埋今日大專學界講啲乜：佢哋話，如果罷課唔成功，會有「進一步」既抗命行動呀。

罷課的確唔係違法既，不過佢哋進一步係進咗去邊度就唔知喇。會唔會係違法行為呢？會唔會帶住班中學生去犯法呢？唔知架，學民冇答你架。就算唔講到犯法，乜真係成本好低咩？唔上堂，追唔上進度，學校又冇責任幫你補課，咁邊個幫設呢班同學呀？你估個個可以去補習咁幸福咩？

我知，學民睇到篇文又會好多辯駁，不過唔該撫心自問，答咗「成本」呢個問題啦。成本對你班想食政治飯既學民梗係低啦，但對其他學生呢？真係你哋口中咁輕鬆？

原圖：bastillepost.com