因應香港少女喺台灣被謀殺而疑兇逃回香港一案，特區政府建議修訂《逃犯條例》，處理較嚴重罪行嘅疑犯喺內地以至台灣潛逃回港、逍遙法外嘅行為，盲反派就全力反對修訂，一時搬出「政治犯」，一時搬出「經濟犯」，甚至為咗反對修例連法庭都要「踩幾腳」；佢哋噚日搞咗個遊行聲稱要反對修例，其中「民陣」召集人岑子杰同立法會議員毛孟靜仲聲言如果政府「硬推」修例，佢哋就會發動或者呼籲港人包圍立法會。言下之意，佢哋係咪又要搞一場類似衝擊立法會或者違法佔領嘅犯法行為，意圖迫使政府「屈服」呢？

出言恐嚇政府？

對於政府建議修訂《逃犯條例》，盲反派基於佢哋「逢中必反」嘅DNA，反對修例基本上就梗架喇，但為咗反對政府而出言恫嚇，甚至話要包圍、圍堵立法會，好明顯就過分咗。例如「民陣」召集人岑子杰，就講到明如果政府「硬推」修例，佢哋就會發動群眾包圍立法會；「香港眾志」就話如果政府唔讓步，佢哋「將再動員抗爭」；身為立法會議員嘅「盲反派會議」召集人毛孟靜，亦都話自己會「考慮」呼籲港人圍堵立法會。換句話說，如果政府要修例，佢哋就不惜包圍、抗爭，可以話係「有咁大，玩咁大」。

想搞「二次佔領」

囍雨就覺得，呢種揚言要包圍、抗爭嘅說法，好似當年一班盲反派嘅年輕人為反對發展新界東北，一班人走去衝擊立法會咁，搞到立法會玻璃門等都撞爛埋，最後13名被告被定罪同坐監，盡失前程。有新界東北十三人嘅「前車」在前，大家對於盲反派呢番「呼籲」，實在不得不防。

講番《逃犯條例》修訂，盲反派為咗反對修例，近期基本上係咩論述都出晒，但囍雨想指出一點，就係佢哋似乎都無正面回應過一個問題，就係諸如「香港人喺台灣懷疑殺人」嘅事件再發生，又或者喺內地發生，香港呢邊係咪要眼白白睇住疑兇逍遙法外呢？原來盲反派口中嘅公義，只係考慮政治問題，而漠視其他罪案！

原圖：《圈傳媒》