廣男今日想同大家分享一則「奇聞」。

話說沉寂咗一排嘅民主黨前主席李永達，近日為咗hard sell自己本新書《判刑前的沉思》，早排專登搞咗個發布會，又話每日都有30、40個「中共黨員」嚟香港，仲講咗句「連監都未坐過，好似唔似樣」。一方面靠嚇，另一方面講到自己入獄好偉大，唔通今時今日，社會文明、道德規範已經「進化」到要坐過監先「似樣」？！咁講法擺明就係美化緊坐監、鼓勵緊犯法？沉寂咗一排啫，唔使靠呢啲博同情、博出位啊！

坐監精彩、有益？

查實今次都已經唔係首次有盲反派人物，將違法坐監美化成一件光彩嘅事喇。好似舊年公民黨黨魁楊岳橋，對住班參加非法衝擊公民廣場嘅年輕人講，留案底會令佢哋嘅「人生變得更加精彩」；又好似民主黨創黨主席李柱銘探完香港眾志秘書長黃之鋒同學聯前秘書長周永康監之後，又話「呢次佢哋坐監，其實對佢哋有益嘅」。廣男好好奇，既然講到坐監咁精彩、咁有益，唔知佢哋會晤會都鼓勵下自己啲親戚、朋友、仔女去坐下監呢？點解次次都係推人地嘅仔女去犯法呢？依家盲反派裡面，老、中、青三代嘅代表人物都咁鼓勵坐監，唔通佢地嘅「上位機制」係好似黑社會咁？廣男真係要勸時下年青人多加小心啦。

講番李永達，佢話自己喺2017年被預約拘捕當日，已萌生寫書念頭，仲話「面臨入獄不覺自己偉大」，「連監都未坐過，好似唔似樣」、「民主唔會天跌落嚟」云云。咦，講呢啲，唔通佢feel到自己要坐監？！講真，佢有咁嘅感覺又唔出奇喎，畢竟做過乜，佢自己心中有數啦。

找埋條佔中數先講

「佔中九子案」嚟緊4月9號判刑，距離而家都冇兩個星期，唔怪得李永達班人趕住喺判刑之前又搞出書又出口術，講到大家身邊隨時有「中共黨員」，為爭取民主被打壓等等。搞咁多花臣，無非想話畀人聽，佢為爭取民主而入獄啫。不過，喺度必須提醒大家一句，千萬唔好忘記呢班「違法佔中」發起人同主事人，當日係自己話要「違法達義、感召民眾」架。依家眼見可能被判刑，就又博同情又扮被打壓，其實，無論點樣為自己開脫，都改變唔到違法嘅事實。

所以，請李永達今次唔好縮沙、找埋條數啦，咁先「似樣」啊嘛！不過，李永達話「面臨入獄不覺自己偉大」又真係無講錯啊，佢地面臨嘅控罪係「串謀公眾妨擾、煽惑公眾妨擾」，並唔係如佢地所吹噓的什麼「追求民主」，所以李永達，你又真係唔使扮偉大，亦都真係唔偉大囉。

原圖：rthk