就社民連主席吳文遠「掟三文治」一案，律政司喺經過詳細研究後，終於決定上訴至特區終院。吳文遠尋日就喺facebook發文，話律政司咁做係「不惜一切」對佢「窮追猛打」喎。查實呢，吳文遠咁講嘢真係好無稽囉！Fact check「掟三文治」案，就連判佢上訴得直嘅法官亦認為佢有犯罪行為，吳文遠唔好以為自己真係無辜先得架。乜佢而家冇掟三文治咩？既然唔係，對佢呢種有做過違法行為嘅人窮追猛打，其實正正係律政司應該做嘅事，唔係點維護香港法治呀？

吳文遠話，律政司為咗一份三文治，「浪費公帑窮追猛打近三年」，而律政司決定上訴，係為咗「權貴面子」不惜浪費公帑云云。囍雨想提醒一句，大家唔好忘記，之前判佢上訴得直嗰位法官亦講得清楚：本案其實有充足證據，證明吳文遠普通襲擊梁振英；法官仲明確表示，如果控方係選擇將梁振英列為受襲者，而非果位署理總督察，吳文遠應該會被定罪。

先唔好講大家同唔同意呢位法官嘅說法，有一點大家必須講清楚，就係咁多位審過「掟三文治案」嘅法官，亦唔認同吳文遠「無辜」！冇錯呀，律政司的確係不惜一切對犯罪行為窮追猛打，係為咗法治公義可以彰顯，同「政治」兩個字無關，反而係證明律政司負上應有嘅責任，守護香港法治！

追究襲擊行為都係政治檢控？

吳文遠喺佢嘅po文臨尾，仲要加個「政治檢控」嘅tag；呢種咪典型嘅轉移視線囉！政治檢控？幾時有政治檢控呀？你自己庭上都認有「掟過三文治」啦，無論受襲對象係邊個都好，呢種疑似襲擊行為都係事實，法律上亦肯定有爭議，既然係咁，檢控你就唔可以叫做政治檢控啦！成日將政治檢控掛喺嘴邊，總係幻想將自己係「英雄」。囍雨想講，其實你係咪諗多咗呢？咁樣為自己「貼金」嘅語言偽術，市民仲會信咩？

吳文遠仲提到，希望「律政司能花多點時間」「檢控梁振英周浩鼎鄭若驊」，囍雨喺度就無興趣猜測佢所指係啲咩案件，不過，如果吳文遠係想講UGL事件、僭建事件之類，其實，無論係廉政公署、審貪會定係律政司外聘法律意見，都已經依據事實，證明上述事件都不成立。囍雨都想奉勸吳文遠一句：不如你都花多啲時間，好好反省下，諗下如何為自己嘅襲擊行為負上法律責任啦！

原圖：rthk