前政務司司長陳方安生、立法會議員郭榮鏗同莫乃光訪美，「反映香港情況」，據傳媒報道，「美中經濟與安全審查委員會」極度擔心香港嘅自由民主發展，預告下一份報告將更清楚列出唔希望見到嘅情況，將《香港政策法》嘅「紅線」列得更清楚。對於美國有改變《香港政策法》嘅想法，廣男只能夠講句，多得陳、郭、莫等盲反派，咁努力爭取美國搞衰香港！

美國接收單方面訊息

對於美國或者有意喺「一定情況」下改變《香港政策法》，繼而可能影響到香港獨立關稅區嘅地位，廣男覺得當中最大「功勞」嘅，一定係盲反派；陳、郭、莫三人，喺《逃犯條例》修訂、「香港民族黨」被禁止運作、香港外國記者會副主席馬凱被拒入境甚至「自決」、「港獨」派被DQ等議題，大家認為盲反派點演繹法？

郭榮鏗喺自己Facebook講明，佢哋喺美國參與活動嘅時候，同人講「香港面對威權體制、一國兩制受壓的憂慮，並鼓勵所有支持民主自由價值的人團結抵抗」，好明顯係企喺特區政府甚至中央政府「對立面」，事實係咪咁呢？撇開他們三人嘅用心唔講，我亦唔去揣測，但係正當而家中美貿易戰一時升溫、一時降溫，客觀效果係，你哋送咗隻好棋畀美國上囉！咁難得有班人嚟美國畀機會搞香港之餘搞埋內地，「咁樣俾晒機會，唔要？對唔住老闆啦！」

盲反派政客成政治棋子

之前香港發生一系列嘅違法行為，甚至有啲事件涉及嚴重暴力，大家都覺得一班後生仔成為咗盲反派政客嘅「棋子」，做咗「政治爛頭卒」去衝去犯法；情況而家調番轉，中美關係拉鋸已久，而香港有班盲反派政客自己飛去美國「送彈藥」畀人，甘於做外國勢力嘅「棋子」，然後仲要不斷喺社交媒體分享「最新狀況」，以為自己好威水咁！其實佢哋係咪唔知自己「賣國」呢？賣得咁高調、自豪，其他人睇到盲反派政客呢啲舉動，都唔知好嬲定好笑。

圖片來源：文匯報