喺違法佔領九疑犯案判決前，作為被告之一嘅民主黨李永達將會出版回憶錄，並由《生果報》率先報道相關內容。李永達引述不具名的所謂「權威人士」稱每日150個單程證入面，有30至40個係「有特別任務嘅共產黨員」，估計20多年來中共已滲透最少21萬地下黨員來港。對於呢種無根據可言嘅抹黑，囍雨覺得李永達以至《生果報》根本係要分化香港，挑起對新移民嘅歧視，令人不齒！

家庭團聚 = 地下黨員？

根據李永達嘅講法，單程證入面每日都有30至40個係「有任務在身」嘅地下黨員，即係話本身以家庭團聚為由嚟香港嘅內地新移民，好多都係地下黨員。對於單程證問題，發展局局長黃偉綸上年就喺網誌講過，單程證來港人士絕大部份屬於家庭團聚，98%為香港人內地配偶或子女；如果將呢個數字套番落李永達嘅講法度，即係話部份嚟香港同家人團聚嘅內地新移民，其實根本唔係嚟團聚，而係「有任務」先嚟香港嘅地下黨員？定係佢哋一邊嚟香港同家人團聚，一邊嚟香港「執行任務」呢？

如果李永達講嘅係前者，咁佢係咪即係想話單程證「造假」？如果係後者，李永達即係話啲人表面嚟團聚，實則係「有任務」？無論係前者定後者，李永達基本上都係得個「吹」字，呢啲咁嚴重嘅指控，如果只係引述「權威人士」就講乜都得，咁以後做咩都唔駛講實據啦！

盲反派販賣恐懼

呢邊廂盲反派議員喺立法會提出有關削減單程證嘅議案，轉過頭《生果報》就登出呢啲報道，囍雨思前想後，都剩係諗到佢哋又想「販賣恐懼」，話內地新移民嚟香港搶地、搶屋同搶資源都唔夠「爆」，就索性話好多單程證人士有「政治任務」；但綜觀呢啲所謂論述，都係站唔住陣腳。

睇番有關單程證人士嘅資料，有近九成持單程證來港人士教育水平有中學或以上，年齡中位數係32歲，仲低過香港整體人口嘅44歲；至於搶資源例如綜援數字，亦有官方數字顯示申請綜援嘅人不足5%係新移民，而新移民佔公屋申請的比率亦都係屬於低。所以，無論係「搶奪資源」以至「政治任務」之說，根本上都只係盲反派諸如李永達向新移民「潑污水」嘅手段。

對於李永達等盲反派嘅言論，大家一定唔可以掉以輕心，萬一有人相信《生果報》呢啲有如「毒蘋果」嘅言論，唔單止社區居民、鄰里之間會造成猜疑，更加會加強部份人士歧視新移民嘅心態，將社會撕裂成本土成長同新移民兩批人，損害極大。而喺呢啲分化事件唯一得益嘅，恐怕就只有靠反內地、反新移民撈選票嘅盲反派政客。

原圖：RTHK