喺佔領九疑犯案判決前，可能會罪成入獄嘅民主黨李永達就把握時間撰寫回憶錄，並且由《生果報》率先報道呢本名叫《判刑前的沉思》嘅回憶錄，當中最爆嘅地方，就梗係李永達引述一名「熟悉香港保安政策並曾參與其中嘅權威人士」話每日150個單程證中，約有30至40人係「有特別任務嘅共產黨員」，仲估計過去20多年已經有21萬地下黨員來港云云。對於呢種「引述消息」當事實嘅說法，囍雨只係想同李永達講句，你講乜都得啦！

權威人士是誰？

對於李永達提出呢種咁「驚人」嘅說法，喺大家判斷孰真孰假之前，應該首先要問李永達一句，佢所引述嘅「權威人士」係邊個，而無論佢或者「權威人士」都好，有冇證據攞出嚟先？如果講唔出或者唔肯講「權威人士」係邊個，而李永達又攞唔到證據出嚟，咁其實李永達就算講乜，大家都證實唔到佢講真定講假架喎！而且李永達係對單程證人士甚至內地政府提出嚴重指控，係咪應該攞出真憑實據？

舉個例子，民主黨成員林子健因為「報假案」罪成被判監，大家都知道喺佢犯案前係同民主黨一班大哥、大姐商量過，而民主黨一眾巨頭包括李柱銘、何俊仁同林卓廷等又陪佢開記者會，齊齊「作故仔」；喺呢個不爭事實之下，如果囍雨話有「權威人士」講，其實林子健只係代罪羔羊，一切都係民主黨一眾元老精心策劃嘅「大戲」，咁喺無證無據嘅情況下，係咪大家又要因為「消息」、「權威人士」呢幾個字而認定民主黨領導先係策劃「釘書釘」事件嘅幕後黑手呢？咁梗係唔得啦，要講證據架嘛。

項莊舞劍 意在「單程證」

喺李永達一本回憶錄入面，《生果報》精挑細選，搵「單程證」呢部分嚟「大做」，係咪真係單純要報道李永達嘅「回憶」咁簡單呢？事有湊巧，盲反派無耐前先喺立法會提出有關削減單程證嘅議案，轉頭《生果報》就整篇〈李永達回憶錄引權威人士：每日40中共黨員 持單程證滲港〉，囍雨就覺得係「項莊舞劍，意在沛公」，借機抹黑內地新移民喇！囍雨喺度必須要講句，喺完全無實證嘅情況下提出呢種「指控」，根本係對持單程證來港人士嘅一種抹黑，《生果報》、李永達喺度散播「恐懼」，只可以話係唯恐天下不亂！ 

原圖：RTHK