高雄市長韓國瑜嚟香港、深圳同內地交流，連日來為高雄簽咗嘅訂單億億聲計，名副其實係「賣水果」、拚經濟；偏偏有班盲反派人士就不斷炒作部分交流行程，甚至稱韓國瑜見中聯辦人員係「賣台灣」咁款，其中「逢中必反」嘅香港眾志黃之鋒接受台灣媒體訪問，仲話「如果韓國瑜覺得台灣不是中華人民共和國嘅一部分，他是不應該去中聯辦，比如說就算是美國或英國的官員來到香港 ，如果想要跟一些北京的代表見面， 他們會直接去找外交部 …」。黃之鋒咁講，如果咁樣類比然後話韓國瑜應該去「外交部」，咁即係台灣已經變相成為咗「獨立國家」，佢算唔算係明目張膽支持「台獨」呢？

黃之鋒又亂咁講

根據黃之鋒接受台灣「三立新聞台」嘅訪問，大抵意思都係話中聯辦喺香港係北京代表，質疑韓國瑜點解去中聯辦之前無跟台灣人做交代，仲講到韓國瑜唔應該去中聯辦，而係好似英、美官員咁去搵外交部，但係英、美係獨立國家，而台灣係中國一部分，台灣高雄市長嚟香港係見外交部嘅話，係咪即係話台灣已經係「獨立國家」先？黃之鋒講清楚好喎！

至於黃之鋒話如果韓國瑜覺得「台灣不是中華人民共和國嘅一部分 …」嘅說法，大家又要問下問下黃之鋒，如果韓國瑜認為台灣唔係中國一部分，就唔應該去中聯辦呢係咩意思？韓國瑜唔係一早講明咗自己係承認「九二共識」嘅咩？咁韓國瑜邊有可能認為台灣唔係中國嘅一部分或者唔承認一個中國？黃之鋒言下之意，係咪佢自己覺得台灣唔係中國一部分，甚至「台獨」勢力先係「正統」？難怪黃之鋒咁鍾意同「台獨」勢力諸如「時代力量」等交流啦！

「一國兩制」 從未改變

黃之鋒之後又講到而家香港唔係行「一國兩制」而係行「一點五制」，廣男覺得根本係盲反派班人作出嚟詆毀「一國兩制」嘅名詞，就攞番黃之鋒做例子，佢屢次示威甚至搞破壞，例如佢近期先到區議會狙擊官員，又喺立法會聽證會搞事，都依然「絲毫無損」，繼續盲反政府、抹黑中央，呢啲唔係「一國兩制」、《基本法》對佢自由嘅保障咩（涉及暴力嘅違法行為另計）？近期黃之鋒由《逃犯條例》修訂到韓國瑜訪港都咁努力「潑污水」，又接連喺區議會、政總甚至立法會滋事，廣男真係非常好奇，黃之鋒以至一班香港眾志嘅年輕政客，到底想玩咩？想策劃「港獨」運動前奏？「港獨」、「台獨」大合奏？定係其他？真係要黃之鋒自己先知喇！

原圖：大公網