高雄市長韓國瑜訪港，唔少傳媒都鋪天蓋地報道有關新聞，韓國瑜本人表明嚟香港、澳門以至內地係「賣水果」、拚經濟，但唔少人就帶住「有色眼鏡」睇韓國瑜，可以話係動作得咎；廣男睇新聞報道，盲反派一眾政客好似對韓國瑜同中聯辦人士會面相當「排斥」，甚至要發聲明、公開信批評，廣男覺得成件事相當古怪，乜高雄市長唔可以入中聯辦，但盲反派就可以肆無忌憚同「台獨」人士勾連咁有趣呀？

本土派妖魔化兩地交流

對於韓國瑜入中聯辦，連一向唔多關心自己國家嘅「本土派」都似乎非常關心，例如立法會議員朱凱迪、區諾軒同「街工」梁耀忠就同香港眾志發表聯合聲明，稱中聯辦無權代表香港，認為「有關安排」唔合適，仲話會面明顯同韓國瑜口裏所講嘅經貿目標「不符」云云；香港眾志黃之鋒甚至向韓國瑜發出公開信話韓國瑜迎來「死亡之吻」，揚言「今日香港，明日台灣」。一句到尾，就係要妖魔化韓國瑜同內地人員或者內地駐港、澳人員嘅一切交流。

台灣作為國家嘅一部分，廣男首先要問一句，高雄市長同內地人員交流，有咩問題呢？盲反派講一堆似是而非嘅歪理，係想阻止兩岸人士交流，定係想台灣「獨立」？老實講，盲反派人士多年嚟成日去台灣同「台獨」人士交流，甚至參加「台獨」、「藏獨」等「反動勢力」勾連嘅活動，佢哋擺明分裂自己國家就可以，但台灣人士同內地人士交流就唔得？廣男實在唔明當中嘅準則，唯一諗到嘅解釋，就係兩岸和平發展以至統一，都唔係盲反派所願見到嘅事，佢哋打從心底就係香港搞「港獨」，台灣就搞「台獨」！

入中聯辦又如何？

之前中聯辦主任王志民邀請立法會議員到訪中聯辦，一班盲反派支支吾吾，就係唔肯同內地駐港人員交流，如果真係要為民請命，真係要爭取普選（可能佢哋而家想搞「港獨」，唔需要交流），又怕咩行入中聯辦呢？其實2010年果時，之所以促成到之後嘅政制改革，多少都係因為有一班盲反派人士肯去傾，當時盲反派肯溝通，而家就閂晒所有溝通大門，咁對香港、對盲反派自己根本都無好處。廣男認為，盲反派自己唔敢行入中聯辦，都唔應該妖魔化其他人，因為佢哋自己唔肯溝通，只係佢哋目光短淺，眼中只有政治炒作。

原圖：Takungpao