《生果報》評論員李怡以〈報應〉為題侮辱已經過世嘅全國人大代表王敏剛，受到社會人士批評；近日李怡不斷回應批評，一時話自己無以〈天譴〉為題寫文，一時又話其他人引用佢嘅題目唔正確，囍雨覺得成件事非常唔妥當，點解佢長篇大論回應人哋對佢嘅批評，偏偏就唔正面回應自己點解要用「報應」嚟侮辱死人呢？佢係自知理虧，明知道理唔夠人講，所以就喺度玩「捉字蝨」？

「報應」論在哪？

今日，李怡再度喺《生果報》撰文，題目係〈供養〉，大抵內容係話自己同《生果報》以至《生果報》同廣告商等嘅關係都唔係「供養」，又倒過來批評番其他人甚至內地。囍雨睇勻成篇文章，見到李怡講咗好多嘢，偏偏就係無回應到自己所寫過嘅「報應」論，點解會咁嘅呢？

等囍雨喺度Recap下，李怡之所以會畀人嚴厲批評，係因為佢以〈報應〉為題撰文，借用網民說話一時以「有請小鳳姐！」、一時又以「吻肛」形容已經去世嘅王敏剛，簡單嚟講就係「抽死人水」、「侮辱死人」，但喺佢唔止一次嘅回應入面，都無一次正面講番自己點解要話死人係「報應」或者話死人嘅生存價值被否定係「真正報應」。李台話自己「寫作60多人」，大家真要問下佢，係咪寫作咗60年，都睇唔到人哋到底批評佢咩呢？

涼薄言論 豈止一起

更重要嘅係，李怡嘅涼薄言論，已經唔係第一次發表，佢除咗喺2008年汶川大地震時意指地震係「天譴」，上年泰國沉船意外有幾十個中國旅客不幸身亡，佢直頭用「自作孽」去形容災難；一次又一次嘅冇人性言論，都清楚睇到李怡確實係道德有問題，既然佢咁「積極」回應人哋嘅批評，點解唔正面回應番自己涼薄言論，而一味喺啲旁枝末節「捉字蝨」？囍雨就覺得，整件事嘅是非黑白好清楚，李怡一直喺度迴避批評，好可能係因為佢都知道的確係寫咗侮辱死人、死難者嘅文章；但迴避問題，唔等於問題唔存在，李怡、《生果報》仲欠公眾一個交代、欠死者一個公道。

原圖：RTHK