一向喺政壇「好有影響力」嘅民主黨（下稱白鴿黨），日前搞咗個「廿四周年黨慶暨籌款晚宴」，與往年唔同嘅係，今年唔係由「資深搞手」李華明主理，而係換咗一班乳鴿嚟搞。原本仲諗住班後生仔會搞出「新境界」，不過廣男睇新聞，成個籌款晚宴都幾慘情，成晚只籌得420萬元，比起上年籌咗500多萬元大為失色，據報有啲枱竟然「吉嗮」無人坐、仲啲就坐唔夠人，連舊年有嚟捧場嘅黃之鋒、羅冠聰都唔見人。廣男好奇，究竟為咩事，白鴿黨作為盲反派入面吸金力較強嘅政黨，都搞到「丁財」都唔旺？無咗李華明幫拖，又唔請特首做賓客嘅白鴿黨，係咪已經日漸衰落呢？

搞晚宴都「上綱上線」

本來，白鴿黨嘅籌款晚宴，喺籌備時就講明唔邀請特首林鄭月娥出席，理由係林鄭月娥「不符合民主黨及市民的期望」、「態度囂張」，此舉令到一向主導晚會籌委會、「吸金力強」嘅李華明極為不滿，佢覺得晚宴係社交場合，唔應該搞得太政治化，於是乾脆劈炮唔理。廣男想講，其實政黨搞晚宴，除咗籌款，另一個最主要功能，咪就係畀大家喺一個較為輕鬆嘅環境，多交流溝通下囉，但係班乳鴿就始終「政治掛帥」，連搞個party都玩上綱上線，呢個唔邀、果個唔請，當白鴿黨「和理非」或者較為開放嘅思維都改變，改為由一班激進乳鴿把持，呢個其實已經唔係大家認識嘅民主黨啦！

講番個晚宴，據報雖然好多司局長都有到場，但只係出席晚宴前嘅酒會，而喺晚宴環節，無咗李華明幫手「吸金」，「銷情」當然較慘淡啦，例如有案在身嘅許智峯，獻唱都得籌得一萬元，胡志偉作為黨主席就好啲，獻唱籌到十幾萬，但當有人話加1.5萬元叫佢再唱一曲時，胡志偉玩自抬身價，話要6.9萬先唱，不過台下無反應，佢就面懵懵收多1.5萬元唱歌。

逼黨員跑數 否則「有後果」

據報，為咗籌款「達標」，班乳鴿仲要求自己友個個將籌款額提高10%，如果「跑唔到數」，分分鐘會「有後果」，例如地區資助受影響等等。廣男想講，籌款係希望有人自願捐錢，唔係逼人交數，與其想盡辦法跑數，不如好好反省下，點解依家少咗人損錢畀自己個黨仲好啦！白鴿黨班議員，平時個個口講民主，自詡代市民發聲、係代議士，高峰期曾經有近20個立法會議員，而家搞到籌款晚會都咁艱難，歸根究柢，係咪要諗下自己嘅議事作風，既嚇怕市民，又嚇怕商界人士呢？

原圖：wenweipo