喺今日香港，總有一班盲反派人士係靠反中央、反內地同胞「食糊」，所以任何可以炒作兩地議題嘅嘢，基本上佢哋都唔會放過；好似之前試過「拖篋」反內地旅客嘅新民主同盟范國威咁，就提出議案要單程證實行雙重審批機制，等政府可以減單程證配額。范國威呢個擺明歧視內地人來港同家人團聚嘅議案，唔單止被大比數否決，好多盲反派自己友都投下反對票或者棄權票，擺明唔撐范國威，佢係咪自己攞嚟瘀呢？

部份盲反派反對議案

呢個由范國威提出、名為「改革移民及入境政策」嘅議案，除左一班所謂激進派例如范國威自己、毛孟靜、陳志全以及鄭松泰投下贊成票外，向來較為「溫和」嘅公民黨同民主黨都有投贊成票；不過，范國威呢個議案都有唔少盲反派人士反對，包括工黨張超雄、社工界嘅邵家臻、教育界嘅葉建源等都反對議案，區諾軒同朱凱迪等人就投咗棄權票。換句話說，一個由盲反派自己提出嘅議案，都有好多盲反派議員唔支持。

點解部份盲反派人士唔撐番「自己友」范國威呢？囍雨唔肯定，但按常理嚟講，其實好多內地同胞嚟香港，唔係純粹話想嚟就嚟，而係佢哋真係有家人喺香港，例如內地女子嫁咗畀香港嘅男士，又或者內地男子聚咗香港女士，以至兩地婚姻但細路仔仲喺內地等等。范國威呢個議案，擺明係要歧視想嚟香港家庭團聚嘅內地同胞，今次有咁多盲反派議員反對、棄權都實在有啲道理。

民主黨都反新移民？

誠如囍雨上面所講，今次范國威嘅議案民主黨都有份贊成，包括鄺俊宇、胡志偉、黃碧雲、尹兆堅、林卓廷同埋許智峯，而涂謹申就無投到票。囍雨覺得幾奇怪，向來較為「大中華膠」嘅民主黨，幾時加入左反對、歧視新移民陣營？嗱，反內地新移民，唔緊要，但請民主黨咁多位尊貴嘅立法會議員，以後喺區見到新移民，記得同佢哋講自己係反對咁多新移民嚟香港，唔好扮晒去幫佢哋爭取權益呃選票呀！

原圖：RTHK