早幾日立法會有個《國歌法》嘅公聽會，一眾盲反派又出動齊齊抹黑《國歌法》，其中社民連梁國雄（下稱長毛）發言時就強調市民表達自由不容剝奪，仲質疑政府想人「愛國」，仲攞埋喺日本示威「燒嘢」被補嘅郭紹傑同嚴敏華嚟講，佢「老友」曾健成就話無建制派為郭、嚴二人發聲。廣男覺得長毛對《國歌法》嘅理解未夠精準，因為《國歌法》的確未必能夠令人「愛國」，就如盲反派唱幾多次都唔會愛國一樣，不過佢至少可以令到人尤其係盲反派政客唔好肆意侮辱國歌，借機做騷！

要防止人侮辱國歌

廣男就覺得，《國歌法》立法，當然未必能夠「促使」人愛國啦，好似有啲政客親英美而「仇中」，就算要求佢哋日日唱國歌，佢哋都唔會愛國；不過，《國歌法》立法至少有一個實質用處，就係防止人「有意」地侮辱、貶損國家同埋國家象徵，例如「香港眾志」一班年輕嘅「自決派」政客之前喺年宵擺明借侮辱、貶損國家嚟「賺錢」，《國歌法》立咗法理論上就可以對呢啲行為加以制約。長毛作為盲反派嘅資深政客，應該明白《國歌法》同《國旗法》、《區旗法》，立法原意相近，至少可以唔畀你班人隨便侮辱國家象徵！

至於曾健成話無人大代表或者建制派為郭紹傑同嚴敏華發聲，廣男就覺得更加可笑，郭紹傑同嚴敏華喺其他國家涉嫌違法，而且聲稱係「示威」而被捕，點解盲反派內部都唔團結一致幫郭紹傑呢？郭紹傑話晒都曾經喺違法佔領期間挺身保護《壹傳媒》老闆黎智英，而家郭紹傑等「落在日本手上」，盲反派素來覺得「示威」、「表達」意見係大晒嘅，點解唔去佔領、包圍下日本領事館，而要建制派出聲？係咪盲反派對住特區政府就兇狠，對住作為美國盟友嘅日本就「扮鵪鶉」先？

《國歌法》立法　盲反派無騷做

老實講，《國歌法》立法，對一般市民可以話係完全無影響，因為係咪構成侮辱或者貶損國歌，就算單Case去到法庭，法庭都要衡量下果個人係咪有意侮辱國歌，證明唔到有意圖咁做，好難入罪；至於盲反派，就梗係比較「擔心」啦，因為無論任何場合，佢哋都以唔同方式喺度做政治騷，《國歌法》未立法，佢哋例如「香港眾志」盡玩，但立咗法就唔到佢哋亂嚟，變相少個方式做「政治騷」。廣男又係果句，如果某啲人無心侮辱自己國家嘅象徵，又怕咩《國歌法》立法呢？ 

原圖：RTHK