曾以「天譴論」形容汶川地震災難嘅《生果報》主筆李怡，日前撰文稱全國人大代表王敏剛離世為「報應」，引發各界人士怒吼。囍雨就覺得，有時唔同政治光譜嘅人立場唔同、互相指正甚至批評，都係正常嘅事，但李怡「一見人死」就話、「有請小鳳姐」、「報應」等等，擺明係侮辱死者同借死者嚟「抽水」，呢啲咁歹毒嘅文痞，讀者仲要睇佢？而養活李怡嘅《生果報》，仲值得廣告商支持？咁樣根本就等同於支持缺德嘅媒體散播惡毒、仇恨言論！

李怡用字毒 用心更毒

綜觀李怡呢篇題為〈報應〉嘅文章，內文除咗用「正能量消息」、「有請小鳯姐」等字眼回應王敏剛死訊外，甚至不惜以諧音「吻肛」嚟戲謔死者名字，又稱一個人死咗反而有人「有請小鳳姐」，係對一個人生存價值否定嘅真正報應；即係從一個人嘅死訊、名字甚至行為都加以否定、抹黑甚至攞嚟講笑，大家一定要問李怡一句，政見唔同啫，講嘢唔駛咁歹毒呀？

過往就算唔同政團、媒體政治立場唔同，媒體、評論員公開「笑人死」嘅情況都好少見，但出名「反中反港」嘅李怡，繼以「天譴論」形容汶川災難後，又試過用「自作孽」形容中國旅客喺泰國遇上船難而死亡，而家又用「報應」論嚟抹黑已經離世嘅全國人大代表，係咪所有中國人、親建制嘅人死，都係好事一件呢？原來政見唔同，對方死亡就係「好事」，《生果報》以至李怡唔單止係盲反派，仲係名符其實嘅「歹毒派」先真！

廣告商還支持《生果報》

令人覺得詭異嘅，係《生果報》以至李怡等屢屢發布惡毒、散播仇恨以至撕裂社會嘅言論，竟然仲有廣告商會喺《生果報》登全版廣告；囍雨想講，喺《生果報》登廣告，並唔係做生意或者宣傳自己商品咁簡單，而係畀錢「養活」、資助一班所謂傳媒人去抹黑、戲謔他人，啲商人真係要諗下，係咪要喺一間會破壞埋自己公司形象嘅媒體落廣告。

囍雨有朋友喺教育界工作，佢同囍雨講其實有唔少通識科老師都會攞《生果報》新聞等作為通識新聞教材；囍雨喺度奉勸各位教育工作者，《生果報》唔單止係Sell「民主」或者「自由」咁簡單，佢哋畀社會以至學生嘅訊息，係連死人都唔放過，如果學生吸收得呢啲仇恨言論多，唔止對學生心理、發展無好處，對我哋嘅社會同樣係有害無益。

原圖：RTHK