前排有一套幾受市民歡迎嘅電視劇，主角有句金句叫「誰大誰惡誰正確」，囍雨覺得幾反映到而家社會實況，香港好似變到邊個啱、邊個有道理已經唔重要，最緊要係講嘢夠大聲、夠惡；將呢句話套番落議會，用嚟形容盲反派就最貼切喇，好似強搶女政府人員手機嘅民主黨立法會議員許智峯咁，明明係自己喺議會滋事，畀保安枱走果時就話保安扭傷佢隻手，但另一邊廂其實係有保安疑似被佢「批踭」打傷。到底係許智峯，定係佢打人，警方真係要認真徹查。

事綠於許智峯鬧事

噚日立法會《國歌條例草案》委員會開會，許智峯等人因為唔滿意議員要喺周五前提交原則性嘅書面提問，所以許智峯就多次叫囂，委員會主席屢次勸告許智峯不果，所以就要求佢離開會議室；作為民主黨當中嘅激進派甚至暴力派，許智峯就梗係賴死唔走啦，當保安枱佢走嘅時候，佢就玩「軟皮蛇」，之後保安枱佢隻手，佢仲即刻發難，最後都係要被抬離場。許智峯話自己受襲，而立法會方面亦就保安受傷報警，大家信邊個？

老實講，呢件事誰是誰非，要警方查過先知，但事情起源，好明顯就係因為許智峯喺度搞事又賴死唔走，所以引發衝突。今次保安受傷案或者許智峯所謂被保安「屈手」案，連同許智峯之前喺立法會強搶女政府人員手機一案，許智峯可以話係已經有兩單案喺身，點解民主黨好似乜表示都無咁嘅？係咪因為要保住自己嘅港島區唯一立法會議員，所以選擇沉默？

民主黨包庇許智峯

之前許智峯強搶女政府人員手機呢單嘢，明明民主黨同許智峯都已經公開道歉，民主黨又講過佢嘅紀律委員會短期內會展開調查，結果就因為單案仲查緊所以「不了了之」；嗱，而家許智峯又喺立法會生事，大家要問下民主黨係咪又扮睇唔到先？許智峯今次有冇打人，或者要警方查過先知，但佢喺議會鬧事在先，基本上就無庸置疑，如果民主黨又扮睇唔到，咁好明顯就係縱容許智峯！如果你問囍雨，囍雨就覺得民主黨唔係咁「公平」喇，同樣涉及犯事，林子健一出事即刻畀民主黨丟棄，但許智峯涉嫌犯事呢，民主黨就因為佢係「雙料議員」所以當睇唔到，囍雨只能同林子健講句，咁鬼你唔係「尊貴」嘅立法會議員咩？你睇下林卓廷潛咗幾耐水就知啦！ 

原圖：RTHK