盲反派政客滋事、暴力衝擊時有所聞，但一個政團喺幾日內數度衝擊甚至涉嫌違法，就真係比較少見；幾日前，以黃之鋒為首嘅香港眾志成員先到南區區議會「狙擊」律政司司長鄭若驊，之後離島區議會開會「眾志」一干人等就去「狙擊」保安局局長李家超，跟住上週五又突然去衝政總聲稱要反對《逃犯條例》修訂，到立法會有《國歌法》公聽會，一班「眾志」成員又再衝過搞到有保安受傷。佢哋連日「狙擊」官員、到處衝擊，所為何事？佢哋係咁搞暴力衝擊，係咪想將搞「暴民政治化」，令到以後搞示威嘅盲反派、青年都用佢哋果套呢？

一而再 再而三滋事

當黃之鋒等人連續去兩個區議會「狙擊」官員，囍雨已經覺得有啲奇怪，「香港眾志」作為一個擺明搞「自決」、變相「港獨」嘅政團，基本上佢哋嘅成員都好難有資格選立法會架喇，無必要博見報以提升人氣參選，到底佢哋搞咩呢？到之後佢哋嘅成員又先衝擊政總，再喺立法會公聽會搞事，囍雨更加覺得背後肯定有「陰謀」，直至今日囍雨睇報紙，見到黃之鋒、周庭等人噚日去咗美國駐港澳總領事館，囍雨即刻「叮」一聲，唔通「眾志」一班人連日滋事，背後係有人指示？

黃之鋒秘會美領館

正常一個政團，如果要就某議題表達訴求，基本上做一兩次政治騷就「夠有餘」，但「眾志」一班人為咗某一、兩個議題幾日之內連踩四場，仲要一係搞到同保安、警員有碰撞，一係直頭搞到有人受傷，呢種「抗爭密度」更加係「密」得令人懷疑；如今「眾志」黃之鋒同周庭喺一連串衝擊之後走入美國駐港總領事館「逗留粒半鐘」，仲要係民主黨創黨主席李柱銘都有份入領事館「懷疑」密斟，時間上會唔會太巧合呢？「眾志」近日嘅行動同外國勢力有冇關係，真係值得大家諗一諗！

對於「眾志」近日連環滋事，除咗唔知係咪同外部勢力有關係之外，囍雨覺得另一可能，就係佢哋嘅骨幹成員羅冠聰將會赴美留學，「眾志」入面一眾「新生代」係時候要「冒出頭來」，借住滋事、衝擊嚟喺「眾志」甚至盲反派陣營入面「爭上位」，所以近日喺幾單「狙擊」、衝擊事件入面，大家都見到有唔少新面孔湧現。囍雨覺得，年輕人參政、關心社會係好事，但如果香港眾志搞果套「衝擊文化」影響到其他青年人，咁咪會將「暴民政治化」，變到好似搞政治一定要搞暴力衝擊先得咁？一班跟住黃之鋒去衝、去「送死」嘅後生仔，最後可唔可以好似羅冠聰咁去美國名牌大學深造好難講，但好似黃之鋒咁留案底甚至要坐監，真係話咁易。

原圖：Wenweipo