佔領九疑犯案將會喺四月頭判決，當唔少人都希望一班主事者會得到應有結果嘅時候，盲反派網媒D100竟然準備搞個「向佔中三子致敬交流會」，睇個勢似係想喺案件宣判前為班被告「集會」。但囍雨覺得好奇怪，一單將會喺法庭宣判嘅案件，竟然有人預備搞集會「聲援」佢哋，會唔會有借此引起公眾關注，間接向法庭施壓之嫌呢？

交流會向佔領疑犯「致敬」？

老實講，佔領九疑犯會唔會被入罪，最應該交畀法庭去處理，班疑犯一早講明自己違法而唔「找數」固然唔應該，但搞集會或者交流會去撐佢哋，因為咁樣分分鐘變咗係向法庭施壓，尤其係個交流會話係向「佔中三子致敬」，係咪想講佢哋無做錯，甚至無犯法先，所以要向佢哋「致敬」？

講開「佔中三子」（囍雨比較喜歡用違法佔領疑犯），佢哋喺2013年開始就喺度煽動違法佔領，仲聲稱自己係「公民抗命」，之後會自首、承擔罪責以完成「公民抗命」最後一步，並以此感召更多人。事情發展到今日，呢班被告唔單止無認罪「找數」，一個個想「走數」之餘，戴耀廷之流甚至以「威權法治」、「威權法庭」等字眼詆毀番法庭轉頭，囍雨覺得佢哋完全無地方值得其他人致敬！

D100意欲何為

值得留意嘅，係D100呢個所謂交流會，唔係平時啲免費畀市民或者支持者出席嘅活動，而係一個每位參加者要收100元嘅活動；囍雨覺得呢點亦都好奇怪，一個向人家「致敬」嘅交流會，做咩要收人錢？囍雨唔敢講話D100借此斂財，不過盲反派搞集會、交流會而要「收錢」，確實「罕見」。點講都好，喺呢個敏感時刻搞交流會向佔領疑犯致敬，佢哋到底係想借機向法庭施壓，還是係純粹搞下政治活動吸引下注意，定係同佔領疑犯「道別」，真係得佢哋自己知！ 

原圖：D100 facebook