繼前日喺南區區議會搞事之後，香港眾志黃之鋒等人又喺離島區議會開會嘅時候搞事，「狙擊」保安局局長李家超，除咗同警察有推撞之外，仲搞到場面一片混亂。連日嚟見到黃之鋒四出搞事，廣男認為只能夠用可悲去形容，一個曾經喺「反國教」行動聲名鵲起，之後喺違法佔領期間登上國際雜誌封面，又被國際雜誌選為最具影響力嘅少年之一嘅黃之鋒，而家竟然淪落成為周圍惹事生非嘅「問題少年」，廣男都唔知係好嬲定好笑。

希望嘅象徵？

廣男睇番2014年10月嘅新聞，話當時啱啱夠18歲嘅黃之鋒，登上《時代雜誌》封面，又入選《時代》2014年全球25大最具影響力少年名單，形容佢係香港抗爭嘅臉孔，甚至有啲人認為佢係「希望嘅象徵」，可以凝聚同齡人為共同嘅信仰而戰云云，之後《時代》要選出度風雲人物嘅時候，黃之鋒仲曾經喺網上投票排第三，只係最後無喺風雲人物最後八強上榜。

見到黃之鋒當時咁「架勢」，有邊個會諗到，幾年之後嘅黃之鋒，喺香港既無政治前途，學業以至其他事業亦唔覺佢有起色，而只係見到佢一味去呢度衝、果度衝，一時就陪下「港獨」人士衝擊下政總，一時又去無乜人留意嘅區議會做「政治騷」呢。廣男覺得，黃之鋒之所以搞到今日咁，全因佢凡事「去得太盡」，激進、暴力之餘仲要搞擺明Sell自決、「港獨」嘅政治組織，結果搞到自己政治前途暗淡。

都係佢啲同路人醒啲

相比起黃之鋒，果時同佢一齊喺違法佔領帶領學生嘅「同路人」，就比佢醒得多喇，據報「雙學三人」之一嘅周永康，已經喺英國名牌大學讀完碩士，攞到美國名牌大學嘅Offer攻讀博士，另一個佔領學生領袖梁麗幗亦已經喺律政樓工作，準備緊做律師。當身邊唔少佔領時期嘅學生代表都已經「行番正路」讀書、工作嘅時候，黃之鋒由全球最具影響力青年之一變成今日周圍撩是鬥非嘅「問題青年」，似乎係「絕望嘅象徵」多啲！

圖片來源：大公報