港區全國人大代表王敏剛離世，享年70歲，對於一個一生心繫國家嘅人離世，正常人都會深表婉惜；個別網民因為死者嘅政治立場或者身份而覺得人哋「抵死」，本來已經非常涼薄，但更涼薄嘅係，有所謂嘅時事評論員要利用呢啲網民說話「再消費」王敏剛，仲話人哋死而世人唔婉惜係「報應」，完全係喺死者、死者親屬傷口上灑鹽。講緊邊個咁陰毒、涼薄？咪就係《生果報》評論員、向來極度「反中」嘅李怡囉！

別拿死人開玩笑！

李怡反建制、反政府甚至反中央，基本上都唔係新聞，如果係佢批評港府、中央，大家都見怪不怪；但佢今日以〈報應〉為題撰文「消費」已故全國人大代表王敏剛，好明顯就Over咗，例如佢借網民把口，不斷用「吻肛」形容王敏剛甚至其他建制派人士，以言語侮辱一個已經去世嘅人，連基本嘅道德都欠缺！廣男唔覺得呢啲「玩笑」好笑，反而覺得諸如李怡嘅所謂評論員，已經「技窮」到只可以消費死者，仲要無恥到係攞死人名字嚟開玩笑。呢啲咁嘅品德，真係連「人」都稱不上。

至於李怡所謂「當他同所有人一樣走完一生，帶給世人的也不會是惋惜，而是『有請小鳳姐！』這才是對一個人的生存價值否定的真正報應。」嘅說法，廣男覺得好值得商榷。首先，所謂世人不會惋惜，好似係講緊向來支持盲反派果班網民炸喎，照李怡講法，係咪有親建制派人士離世、盲反派支持者「請小鳳姐」都係「報應」呢？掉番轉咁講，如果有盲反派人士離世，建制派支持講者兩句，咁呢啲又係該盲反派人士嘅「報應」嗎？幾時一個人有冇報應，完全係基於人家嘅政治立場咁狹隘架？

李怡的「天譴論」

老實講，政治立場唔同，要去批評唔同陣營嘅人嘅政見，廣男唔覺得有咩問題，但如果係連死人都「唔放過」嘅，廣男就絕對唔贊成！更重要嘅，係李怡已經唔係第一次攞死人嚟「消費」。之前有40多名中國旅客喺泰國布吉翻船意外身亡，李怡就以「自作孽」嚟形容，畀人質疑佢嘅人性；再數前啲，2008年汶川地震，李怡又撰文講過汶川地震係「天譴」。呢個世界有冇報應，廣男唔肯定，但李怡專攞死人嚟消費，就肯定有欠品德，應該受到譴責！

圖片來源：RTHK