以民主黨立法會議員林卓廷、尹兆堅為首嘅盲反派，炒作咗「UGL事件」四年有多，除咗向公眾籌錢聲稱要追查「UGL事件」但實質去咗英國、澳洲疑似「暢遊」之外，基本上係乜證據都交唔出，反而英國唔同執法部門、香港執法部門以及律政司都先後已經還咗梁振英一個清白。「一計不成，又生一計」嘅林卓廷同尹兆堅，今日就「推咗」社民連曾健成出嚟做司法覆核，聲稱要挑戰律政司唔檢控梁振英嘅決定。廣男就覺得，喺司法覆核（下稱JR）勝算低、可能要孭一筆訟費喺身嘅情況下，林卓廷識得推其他人出嚟入稟，佢真係精甩尾！

點解唔自己入稟？有事林卓廷不用上身？

廣男今日又睇新聞見到林卓廷、尹兆堅同曾健成等人見記者，廣男第一個疑問，就係林卓廷、尹兆堅既然話要繼續「追究」「UGL事件」，點解佢哋唔自己入稟，要推曾健成出嚟入稟呢？當中原因，可能係因為想申請法援啦，而喺申請法援失敗後，曾健成就順理成章成為呢場訴訟嘅「主將」，對於近年喺政界人氣低沉嘅佢嚟講，或者都係「好事」嚟嘅，不過廣男就勸佢要小心啲喇！

點解要叫曾健成小心啲？今日林卓廷見記者，聲稱「天下為公」計劃係準備支援曾健成所有嘅法律開支，「至於官司完結訟費的判決，到時我們再商量怎麼樣」；照字面睇，曾健成所有嘅法律開支，都會由林卓廷、尹兆堅嘅「天下為公」去負擔，但講到官司完咗關於訴訟費用嘅判決（廣男諗尤其係曾健成敗訴、要畀訟費），就「到時先算」喇！咁係咪即係如果曾健成輸咗要畀訟費，林卓廷就到時先算，分分鐘唔出錢先？

林子健事件「前車可鑑」

嗱，唔係廣男「以小人之心度『小人』之腹」，之前林子健疑似「自編自導自演」「釘書釘」事件，老作自己畀內地人員擄走，佢喺開記者會前就係同民主黨一眾大哥大姐商討，之後李柱銘、何俊仁同林卓廷等民主黨領導人馬陪林子健出嚟開記者會「齊齊吹」；但當林子健畀人踢爆佢「作故仔」後，林卓廷幾乎立即劃清界線，好似唔識林子健咁，甚至林子健上庭都唔出庭撐佢。所以呢，今日曾健成有利用價值，林卓廷梗係「牛哥」前、「牛哥」後啦，但如果曾健成輸咗要找以百萬計嘅訟費，搵林卓廷、尹兆堅找數果時，曾健成會唔會變成「林子健翻版」，大家真係睇過先知喇！

至於曾健成本人，廣男極度懷疑其實唔係好知發生緊咩事，事關佢見記者果時，一時話「身兼UGL董事的錢果豐進入行政會議」（實情錢果豐果時已經冇做行會成員），一時又話「UGL接了很多基建包括沙中線」（實情應該係另一公司接過唔少沙中線工程）。廣男真係想同「牛哥」講句，江湖險惡呀，當連前民主黨成員都話林卓廷「人格卑劣，毫無政治道德」嘅時候，你小心畀人利用呀！

原圖：《圈傳媒》