廉政公署執行處處長朱敏健退休，佢日前接受傳媒訪問，談及到「UGL事件」嘅時候，表明不評論案件，但佢相信律政司係咪就案件提出檢控時，會根據證據作考慮。囍雨覺得朱敏健一番說話，正正切中「UGL事件」嘅要點，就如律政司當時聲明所指，根本冇足夠證據顯示前特首梁振英有犯法，但盲反派就將道理掉轉嚟講，講到冇證據都要告先至符合公義咁。其實，《普通法》入面「無罪假定」嘅法治精神，一向被盲反派奉為奉為圭臬，但佢哋為咗攻訐梁振英連法治都不顧，可謂既可悲，又可笑。

冇證據都要告？

對於律政司喺作出「UGL事件」不檢控決定時無尋求外聘法律意見，朱敏健接受訪問時話係咪尋求外聘法律意見，需要根據個別案件嘅整體性質同因素考慮，唔係「鐵一般嘅規矩」，更以「巧婦難為無米炊」形容，如果證據不足，好難想像一位律師主張唔檢控，而另一位律師就主張檢控。朱敏健又指，過往冇試過有案件廉署要求檢控，但律政司不提出檢控。

事實上，「UGL事件」就係一單根本無證據或唔夠證據作出檢控嘅事件；廉署調查嘅案件，除咗有律政司作出檢控決定之外，律政司最後告唔告，仲要經過一個極具權威性嘅審查貪污舉報諮詢會做最後審視，其委員包括有受英國認可的資深大律師甄孟義、民主黨律師陳莊勤及其他專業人士，喺一重重獨立而嚴謹嘅調查、檢控機制下，律政司根本冇可能「放生」梁振英，盲反派之說除咗係侮辱律政司，亦係對本港法治嘅一種詆毀！

「翻遍每一塊石頭」調查UGL

廉署審查貪污舉報諮詢委員會主席鄧國斌講過，廉署一直不偏不椅調查「UGL事件」，署方已「想盡辦法，千方百計」、「leave no stones unturned（翻遍每塊石頭）」地調查，並無因為涉及事件人士嘅身份而有所不同，而審貪會過去幾年一直知悉調查過程，多次開會討論跟進。囍雨就覺得，無論係日前受訪嘅朱敏健，抑或月前為「UGL事件」發言嘅鄧國斌，都清楚帶出一個訊息，就係律政司、廉署以至審貪會公正處理「UGL事件」，既無偏私，更無「放生」；至於盲反派種種對於律政司以至梁振英嘅攻訐，囍雨認為佢哋所依據嘅根本唔係紮實嘅法律理據，而只係為咗攻訐律政司、梁振英而作出嘅政治「陰謀論」。