幾個理大學生因為以「刮友」式方法狙擊教職員，期間更涉嫌誹謗、禁錮同襲擊教職員而被理大處分，其中碩士生何俊謙更被勒令退學；對於何俊謙被勒令退學，社會普遍認為學生犯錯，係應該受到懲罰，亦有意見亦為校方「罰得太重」。本來事件隨住校方宣布懲處後已經告一段落，但何俊謙近日四出為自己「呼冤」，噚日仲公然同唔同盲反派政黨喺理大示威，又喺學校民主牆貼上「港獨」旗，囍雨真係想講，對於呢啲死不悔改嘅所謂大學生，真係值得社會、學校再畀機會咩？

一錯再錯 毫無悔意

噚日下晝，何俊謙到理大出席聲援佢哋嘅活動，同社民連、人民力量、香港眾志等盲反派一齊示威，據報仲爭啲同在場保安起衝突；何俊謙聲稱自己「無使用武力」、「無禁錮」等等，之後喺活動尾聲，何俊謙仲公然喺學校民主牆貼上「港獨」旗，又喺Facebook宣稱咁做「想話畀大家知我要堅持到底」。

綜觀何俊謙近日嘅一言一行，以及佢噚日喺理大嘅所作所為，囍雨只能夠用一錯再錯、毫無悔意去形容佢；相信任何睇過佢哋「刮友」短片嘅人都會覺得，佢哋絕對唔係咩同校方講道理或者表達訴求咁簡單，一時作出疑似誹謗、極具侮辱性說話，一時又攤開雙手唔畀教職員走，甚至搞到教職員跌低受傷，如果咁樣都叫表達意見或者行使言論自由，咁以後啲學生照樣咁對待啲教職員，咁校園根本再無規矩可言！

學校難收回成命

何俊謙一干人等「去到咁盡」，校方嘅懲處決定本來已經無乜扭轉餘地，而家何俊謙連同盲反派政客喺理大校園「再下一城」，近日唔認錯仲要不斷諉過於理大校方，甚至喺民主牆貼上「獨」旗嚟耀武揚威，囍雨覺得理大更加唔需要畀機會佢或者其他被懲處嘅學生。當個別人士同埋盲反派係咁出力撐何俊謙等人嘅時候，大家問心，如果一個學生知錯、道歉，或者仲值得大家畀個機會佢，但如果呢個學生完全唔知錯，甚至話自己嘅罪名只係「莫須有」，將個「波」卸番畀學校，咁校方以至社會又有咩空間畀機會佢呢？言論自由唔係大晒，表達自由亦唔包括誹謗、禁錮，今日何俊謙嘅言行，其實多多少少都有模仿盲反派嘅行事作風，香港真係多得呢班政客唔少！

原圖：RTHK