幾名理大學生因為涉嫌誹謗甚至襲擊校方人員，被理大嚴肅懲處，盲反派貫徹「凡事站在另一邊」嘅立場，不問是非聲援被懲處嘅學生，甚至發表聲明話校方「有責任」，全國政協副主席梁振英質疑點解被處分嘅唔係「泛民頭頭嘅子女」，《生果報》專欄作家馮睎乾「急不及待」出嚟抽水，話因為「泛民頭面人物的子女沒犯事」、「怎知道『泛民頭面人物』沒鼓勵自己子女上街呢？」，狀似為盲反派政客「呼冤」。其實梁振英所講嘅道理好簡單，當大家眼見盲反派人士係咁鼓吹違法達義，但睇新聞見到抗爭畀人拉嘅幾乎都係人家子女而唔見盲反派嘅子女，質疑盲反派推人家子女「送死」可謂非常合理，套用馮睎乾嘅語氣，佢又點知道盲反派政客「有」鼓勵子女上街、抗爭甚至用暴力呢？《生果報》道理講唔過去，就要玩醜化？

盲反派子女沒犯事？

《生果報》專欄作家馮睎乾以〈梁振英的下半生〉為題撰文，用佢極具分析力嘅文章，剖析被處分嘅唔係「泛民頭面人物的子女」，其中一個原因係「泛民頭面人物嘅子女沒犯事」，睇到廣男非常驚嘆，呢啲分析真係獨到到呢，好似無答過問題咁！之後又提出質疑話梁振英點知道「泛民頭面人物」沒鼓勵子女上街；廣男套用番馮睎乾嘅邏輯，佢又點知道「泛民頭面人物」有鼓勵子女上街呢？更何況，而家唔係講緊「上街」咁簡單，馮睎乾又點知道「泛民頭面人物」鼓勵其他人「違法達義」之餘，都有鼓勵自己子女「違法達義」、勇武抗爭甚至襲擊警察呢？

事實擺在眼前，大家睇新聞見到抗爭而畀人拉甚至坐監嘅年輕人，的確係唔見盲反派嘅頭頭嘅仔女，大家自然會問，盲反派成日有意無意煽動人抗爭、違法，但大家點解見唔到嘅盲反派人士鼓勵或者帶埋自己嘅子女出嚟衝下、襲下警呢？馮睎乾與其質疑其他人點知道盲反派頭頭無咁做，不如佢話畀大家聽，邊個盲反派有咁做，推人哋仔女做「砲灰」之餘，都不忘叫自己仔女出嚟衝下、做下砲灰甚至掟下磚頭啦。

《生果報》來一套《過火新聞線》吧

其實《生果報》以至佢嘅主筆、專欄作家想像力咁豐富，咁「積極」投入社會，專門對違法人士、激進份子甚至「港獨」份子「歌功頌德」，反正都係「做故仔」，不如自己拍番套《過火新聞線》，話畀人知傳媒為咗達到目的可以去到幾盡啦，話唔定票房會多過《導火新聞線》架喎！

原圖：Takungpao