《生果報》副社長陳沛敏早前回信旺角暴動囚犯盧建民，並用「不被馴化，不甘羈絆，自由自主，勇猛剛強，勇於突破規限，敢於開創新潮」嘅野豬精神鼓勵盧建民，畀全國政協副主席梁振英質疑為鼓勵暴徒；日前，盧建民嘅Facebook專頁「影攝食」上載咗一封「回梁振英的信」，內容除咗提到旺角暴動外，更提到「UGL事件」。囍雨真心想請教下盧建民，佢講「UGL事件」嘅時候，係咪連執法機構已經還咗梁振英清白都唔知？唔通佢同《生果報》一樣，都係鍾意玩老屈？

盧建民無知定無良？

囍雨上網睇盧建民封所謂「回梁振英的信」，信入面提到旺角暴動時，盧建民竟然指旺角暴動係由「政策失當而起」，囍雨唔明白，所謂「政策失當」係點解法呢？又或者，係咪暴徒只要唔滿意政府施政，就可以為所欲為，襲警、燒車，都可以合理化呢？盧建民甚至陳沛敏似乎都唔敢提及一個核心問題，就係暴徒用暴力、襲警到底有幾錯！

至於盧建民喺文中提及「UGL事件」，並稱「閣下收了UGL 五千萬，如果這事件發生在歐美，一早就坐牢啦！還有時間給閣下在外面談笑風生嗎？」，囍雨又想問下盧建民，歐美包唔包括英國？所謂如果事件發生喺歐美一早「坐牢」，係咪想話有人犯咗法呢？「UGL事件」除咗有本港嘅律政司、廉署決定唔檢控之外，之前民主黨立法會議員林卓廷到英國作「投訴」，英國唔同嘅執法機構一係話梁振英冇喺英國違法，一係就表示唔會再跟進調查；即係話無論係英國以至香港嘅執法機構、檢控部門都已經還咗梁振英一個清白，盧建民咁樣講，一係就無知，一係就無良擺明玩老屈！

《生果報》聰明得多

盧建民公開講呢番說話，囍雨覺得佢極可能已經觸犯誹謗罪，相反《生果報》就聰明得多喇，一邊引用盧建民說話抹黑梁振英，一邊就係文章尾段寫明「廉署去年底宣佈完成UGL案調查 … 認為冇足夠證據向梁振英提出檢控而達致合理機會定罪」。咁即係咩意思？即係話如果有人要為言論負責，果個就係盧建民囉，至於《生果報》喺文章尾段都講明「冇足夠證據」告梁振英，有起事上嚟《生果報》實話唔關佢事喇！所以呢，點解坐監嘅係諸如盧建民呢啲「衝動派」，而唔係《生果報》呢啲「文人」，係有原因嘅！ 

圖片來源：大公網