近年盲反派「反政府」嘅力度，除咗經常「小事化大」，妖魔化政府之外，基本上已經去到一個不時將「好事變壞事」嘅程度，例如填海造地起樓，佢哋可以吹到會用盡萬億儲備，高鐵有「一地兩檢」便利市民，佢哋又可以講到行過西九站附近都可能「被人捉」咁，可謂「越吹越有」。日前財政司司長陳茂波發表《財政預算》，其中提出用200億元購買60個物業，提供逾130項社福設施，結果就畀盲反派質疑為「利益輸送」；囍雨只係想講句，如果政府介入、協助增加社福設施都可以畀人咁抹黑法，咁政府點樣用啲資源，都可能動輒得咎架喎！

政府介入 = 利益輸送？

老實講，盲反派砌政府，一向最緊要有Sound Bite，好似新民主同盟立法會議員咁，就住相關措施喺立法會指陳茂波「用公帑利益輸送買劏場番嚟再畀啲社福機構去提供服務」；首先，大家要問下范國威，「用公帑利益輸送」係咩意思？係指政府攞啲錢出嚟益「自己人」？定係政府買啲物業嚟背後有咩利益關係？范國威提出咁嚴重嘅指控，但無證據喎！

對於范國威呢種近乎誹謗嘅攻訐，陳茂波都直斥范國威「聲大就唔表示有道理」、「顛倒是非，混淆視聽」，表明勞福局會就建議去立法會諮詢。根據財政預算案內容，政府提出撥款買物業做社福設施，包括日間幼兒中心、長者鄰舍中心、到校學前康復服務等，盲反派係咪唔抵得政府做好事，所以要安啲「罪名」畀政府呢？雖然喺特權法之下立法會議員喺開會時言論免責，但范國威作為代議士，都唔應該亂嚟。

適當監察 絕無問題

政府要喺私人市場購入物業，會唔會買貴咗，或者會唔會買咗唔適當嘅選址等等，呢啲都係要監察嘅事，但如果好似范國威咁「一下子跳咗去結論」，仲要係安插「罪名」畀政府官員嘅「結論」，咁同老屈基本上無乜分別。范國威呀范國威，大家知道你近期人氣下滑，講激進唔夠其他本土派激進，講議題又唔見你有帶起咩議題畀社會討論，但靠Sound Bite、老屈官員嚟出位，始終都唔係做議員嘅「長治久安」之策嚟架！

原圖：RTHK