盲反派喺香港政壇玩咗三幾十年，佢哋向來有套絕招，就係「冇事講到有事，有事再講到好大件事」，之前無論係新界東北發展、高鐵「一地兩檢」等等，佢哋都將呢種精神發揮得「淋漓盡致」；最近中央公布大灣區嘅規劃綱要，叫得「綱要」，盲反派梗係攞嚟「上綱上線」喇，廣男最近又見到盲反派元老、資深大律師李柱銘撰文，除咗講「被規劃」等盲反派嘅「慣用語」外，李大狀最終仲可以將香港推到「一國一制」。廣男就覺得，李柱銘呢種「冇變有，有變大」嘅「推論」能力，喺盲反派入面確實係「無人能及」！

「炒埋一碟」的技術

李柱銘日前喺報章撰文，除咗繼續盲反派反對大灣區規劃嘅line to take之外，李大狀仲用「炒埋一碟」嘅方式，由議員DQ、高鐵「一地兩檢」等事件，再講到大灣區規劃，話中央會先畀香港一啲甜頭例如經濟優惠、生活便利，之後港人就要付出代價，獨立司法制度、各項目由等「被消失」，最後中央就會落實「一國一制」等等。廣男只係想講一句，李柱銘嘅想像力，實在係太好喇！

首先，喺大灣區規劃入面，中央用政策令香港得到經濟優惠、生活便利，呢啲廣男都唔會反對，但係佢講到香港法治、自由以至生活方式至社會文化等都會「被消失」，甚至最後會變成「一國一制」，廣男就相當有保留喇！因為香港之所以喺大灣區規劃入面有咁重要嘅角色，正正就因為「一國兩制」、「高度自治」所發揮嘅優勢，呢啲喺規劃綱要入面都可以睇到，李柱銘將大灣區會令到「一國兩制」變「一國一制」，結論係好驚人，只係無乜實據可言啫。

盲反派曾支持粵港經濟融合

講到呢度，廣男又想溫馨提示下李柱銘、民主黨甚至係盲反派，幾年前一個由議員提出、關於促請特區政府把握國家機遇、促進粵港經濟融合嘅議案，盲反派包括民主黨係有份贊成架；即係話今日大灣區規劃一系列經濟合作或者融合措施，民主黨有份推動架喎，套用從政者最鍾意用嘅Term，就係民主黨有份「成功爭取」，廣男唔知當時民主黨咁踴躍支持有關議案，李柱銘知唔知呢？又或者李柱銘同民主黨係咪已經屈服於激進勢力之下，所以已經由「和理非」變成「勇武反對派」？民主黨嘅立場，有時真係令人覺得好難捉摸！

圖片來源：文匯報