財政司司長陳茂波噚日發表《財政預算案》，向來以攻擊政府為己任嘅盲反派，梗係要係咁搵位「挑骨頭」啦；今日囍雨睇《生果報》，見到頭條新聞寫搞大灣區嘅資源達455億元，當堂嚇一跳，於是就認真地搵《財政預算案》入面睇一睇啦，原來好多根本唔係直接用落大灣區度，甚至可以話唔一定關大灣區事。《生果報》為咗抹黑大灣區，要咁辛苦喺份《預算案》度「計」455億元出嚟，真係辛苦晒！

《生果報》係「篤數」天才

《生果報》呢篇題為〈預算案輕平民重聖旨 派糖縮百億 455億搞大灣區〉嘅頭版報道，導言就寫「涉及大灣區範疇所投放金額逾450億元，但紓困措施全面縮水，較上一份預算案少近百億」，囍雨就覺得好奇怪，真係用咗咁多錢喺大灣區？於是就上網睇下份《預算案》啦，發覺好多都唔知關唔關事，甚至唔關事架喎！

舉個例，《生果報》話政府會注資200億元喺教資會轄下嘅研究資助局研究基金，囍雨上番研究資助局網站入面嘅「撥款統計數字」，入面除咗有應該係同國家合作嘅相關研究，亦有關於同法國、德國、歐盟嘅研究或者合作計劃，仲有其他林林總總嘅研究計劃，《生果報》咁樣「入」大灣區數，真係勁！

再舉一例，《生果報》寫政府預留160億元翻新大學曾建或翻新科研設備等，囍雨睇番份《預算案》，入面寫明係畀大學生同科研人員可在最佳環境下進行教學及研究活動，呢啲又算係「涉及大灣區範疇所投放金額」？香港自己要做好科研工作就等同於「傾斜大灣區規劃投資」？定係因為大學入面嘅科研人員或者學生應該有內地人，所以又「入」大灣區數呀？《生果報》將條數「計」到多過派糖所用嘅大約430億元，然後就大字標題話畀人聽港府用咗好多錢喺國策上，真係「計數」天才。

誤導性極強的新聞

其他項目例如擴建數碼港、擴大科企投資基金等，《生果報》統統定義為「傾斜大灣區規劃投資」；老實講，啲數字點定義、演繹，媒體各有說法，唔緊要，但「扭」到筆數仲多過派糖，再出到咁嘅頭條報道出嚟，《生果報》實在太厲害喇！

原圖：RTHK