曾幾何時，港人北上消費總係覺得有啲唔方便，下下都要事先兌定啲人民幣，用完番嚟剩番啲人民幣又要擺喺度，等下次（唔知幾時）再番上去定用得著；而隨住近年微信支付、alipay等電子銀包大行其道，港人的北上時嘅「現金消費模式」仲要顯得非常「老土」。廣男試過同家人番內地食下嘢、行下，去到有啲舖頭直頭話唔收現金；又試過曾經有幾次同內地友人Gathering，朋友攞部手機「嘟」一聲搞掂，仲要講一句：「我哋依家出街都唔使帶銀包架喇，一部手機全程搞掂」。廣男心諗，如果香港嘅支付工具去到內地都用到，大家話幾好呢？

電子銀包方便港人

對於廣男呢種「疑惑」，最近終於聽到有好消息，有報道指下個月開始，AlipayHK就有得喺大灣區城市，廣男覺得今次最難得嘅，係喺電子支付過程中，應用程式會自動解決匯率轉換嘅問題，可以直接用港幣交易。大家千祈唔好睇小呢一點，試想一下，一張一千蚊港紙，換成大約8張100元人民幣，下下以現金交易，銀紙就「越打越散」，荷包就「越來越厚」，不方便攜帶之餘，剩番啲散紙都唔知點處理；更重要嘅係，有得用電子銀包之後，香港人就唔使擔心「唱」到假銀紙啦！

隨住大灣區建設不斷細化、落實為具體政策措施，可以預見，港人北上，無論係做生意定係吃喝玩樂，只會越來越多，實在有必要改變下思維方式，學會適應新的消費模式，唔好覺得「一張八達通已經足夠先進」；而家有支付工具可以番內地用，廣男認為只係方便港人番內地嘅其中一個措施，亦只係一個開始。

情況就好似大灣區規劃綱要入面，話要研究取消港澳手機到大灣區嘅長途同漫遊費一樣，都係便利到香港人嘅方向。老實講，下下未過關就要將電話入面嘅「流動數據」功能關閉，然後喺內地要去到有Wifi嘅地方先上到網，實在係非常之唔方便，如果流動支付、電話上網等問題都解決好，香港人番到上去，最少會覺得買嘢同用電話都好似喺香港咁方便先啦，大家點睇？

圖片來源：新華社