中央政府發出公函，支持港府禁止「香港民族黨」運作、維護國家主權係港府義務同埋請港府就事件提交報告。當班盲反派不斷話中央干預香港內部事務、破壞「一國兩制」嘅時候，囍雨真係好想問，點解佢哋會覺得「港獨」係香港內部事務？破壞「一國兩制」嘅，乜唔係搞「港獨」嗰班人咩？再者，既然而家家連中央都表明支持港府執法，而喺香港搞「港獨」嘅組織又唔止「香港民族黨」一個喎，咁港府亦好應該果斷執法，取締埋其他「港獨」組織喎！

「港獨」組織頻現

冇行動、得個講字嘅，囍雨都唔同佢計，剩係講有活動、有行動嘅，數數手指就包括幾年發動「旺角暴動」嘅「本土民主前線」，該組織時任發言人、家陣正式成為暴動犯嘅梁天琦更曾經豪言建制、泛民同本土派要「三分天下」，不過自從梁天琦入獄、組織另一骨幹黃台仰棄保潛逃之後，「本土民主前線」基本上已經無以為繼，但咁唔代表唔使取締喎，你點知佢幾時死灰復燃先？

雖然「本土民主前線」已經基本Bye Bye、「香港民族黨」亦已經被禁，但查實同一時間亦有唔同嘅「港獨」組織冒出嚟，諗住喺「港獨」派當中做「領頭羊」，例如由喺立法會宣獨辱華嘅梁頌恆做發言人嘅「香港民族陣線」、喺「香港民族黨」被禁時不斷出風頭嘅「學生獨立聯盟」，以及擺明向學生播「獨」嘅「學生動源」；如果港府要禁「香港民族黨」，以上嘅「港獨」組織一樣要禁！

他們的目標是學生！

囍雨必須強調，以上組織嘅問題，唔單止係播「獨」咁簡單，而係佢哋向大學生甚至係中學生播「獨」，仲講到明唔排除要用武力果隻；例如「學生動源」一班主事者睇落去連廿歲都未夠，但就開宗名義「支持一切有效抗爭並參與其中，包括勇武抗爭」、「向香港中學生宣揚香港獨立理念」，又不斷向中學生播「獨」；如果任由佢哋繼續亂嚟，只怕下次再有「勇武抗爭」，行出嚟嘅就唔係80、90後，而係一班可能連成人身份證都未攞嘅00後！

港府依法禁止「香港民族黨」運作，可以話係行出咗正確嘅第一步，但處理「港獨」問題依然長路漫漫，尤其係「港獨」歪風已經喺大學甚至中學校園散播開來；囍雨認為，當一班政客喺度推波助瀾嘅時候，大家更加要有所警剔。 

原圖：RTHK