今年11月就係區議會換屆選舉，各方陣營基本上都擺好咗個「陣」，準備迎戰。近年越戰越頹嘅民主黨，日前就搞咗個「選舉退修營」，向有意參選嘅社區主任傳承選舉經驗，其中立法會議員林卓廷就提醒社區主任「千祈唔好覺得自己落嚟做區係救世主心態」，而且「千祈唔好覺得市民冇我咁叻」。林卓廷又講得啱喎，佢自己落區話要「做返好上水」、處理水貨客問題，結果居民見唔到有成績，有啲仲覺得佢剩係識抽水，佢梗係唔係咩救世主啦！

對於林卓廷嘅救世主論，有種講法係話林卓廷叫人唔好當自己係救世主，潛台詞係「你哋唔好當自己係救世主呀，因為我先係救世主」；對於呢種講法廣男都覺得幾惹笑，事關林卓廷近年不斷炒作「UGL事件」，當正自己係「廉政先鋒」、救世主咁款，不過佢呢個「救世主」炒作咗「UGL事件」咁耐，唔單止得個桔，英國執法機構同香港律政司、廉署都先後還咗全國政協副主席梁振英一個清白，佢自己亦都畀市民話佢掠水做「政治騷」，所以話佢係救世主，就肯定係唔啱架喇。

扮救世主的政棍

至於另一種解讀，廣男就覺得比較合理喇，林卓廷叫人唔好當自己係救世主，係真心嘅，因為佢自己當年喺上水石湖墟落區，一邊攻擊對手，一邊高調聲稱要「做返好上水」、處理水貨客問題，講到自己成個北區（上水、粉嶺）「救世主」咁，結果呢？結果梗係水貨客問題依然嚴重甚至更加嚴重啦！林卓廷令廣男印象最深刻嘅水貨客「兩大戰役」，一單就係叫有關單位移走街道電話亭等條路好行啲（所以有北區人叫林卓廷做「電話廷」），一單就係今年農曆新年前搞咗個反水貨客遊行。呢個林卓廷，2015落北區選區議員，2019先嚟搞反水貨客遊行，係咪因為選舉年先出嚟做Show呀？

當林卓廷叫人唔好當自己係救世主嘅時候，廣男覺得唔好話救世主，林卓廷根本連基本人格都好值得懷疑，誠如一班因為林卓廷退出咗民主黨嘅人話齋，林卓廷只係一個人格卑劣、毫無政治道德嘅人。林卓廷有一句講得啱嘅，就係「千祈唔好覺得市民冇我咁叻」，市民梗係唔會蠢啦，一睇就知佢做騷多過做嘢，當初選議員講咩「做返好上水」等等，根本都只係空頭支票！

原圖：RTHK