全國政協副主席梁振英出任「共享基金會」主席，同一班社會賢達推動國際人道救援工作，盲反派不問是非，立即以唔同理由攻訐梁振英；繼日前《生果報》「描繪」到梁振英做人道救援工作好似「有陰謀」之後，違法佔領發起人陳健民亦加入「戰團」，撰文稱「一個曾經以87枚催淚彈鎮壓手無寸鐵示威者的獨裁政客，如何在國際上推動人道主義？」，囍雨想問下，啲催淚彈係梁振英叫放嘅咩？同埋陳健民無理由連當時嘅背景都唔清楚，就喺度屈人呀？！

扭曲催淚彈事件

對於陳健民「一個曾經以87枚催淚彈鎮壓手無寸鐵示威者的獨裁政客，如何在國際上推動人道主義？」呢番話，大家可能會理解到話係梁振英叫人放催淚彈驅散示威者，但誠如當時政府以至警方所言，施放催淚彈係警方決定，根本就唔係梁振英叫放嘅，陳健民呢番說話，似係老屈多啲喎！

如果陳健民呢番說話有另一番意思，例如話係梁振英治下嘅警方放催淚彈「鎮壓」示威者，囍雨只能講句，陳健民又錯喇！喺違法佔領時期已經有媒體訪問過決定施放催淚彈嘅警方指揮官，該名指揮官直言當日有示威者非常暴力，有啲用雨傘襲擊警察，有啲就用腳踢，經過幾小時評估，面對200幾名示威者試圖撞破警方防線，所以授權屬下警員使用催淚彈；果名指揮官特別強調，使用胡椒噴霧已唔能夠起到作用，如果示威者突破警方防線，公眾會受到嚴重傷害，甚至發生人踩人慘劇。換言之，陳健民所講「催淚彈鎮壓手無寸鐵示威者」根本就唔係真，甚至可以話，如果警方當時無採取果斷措施，分分鐘傷亡慘重。

借善事炒作、攻訐

囍雨覺得，如果真係要講違法佔領，講催淚彈事件，無論係一班受煽動而衝擊嘅示威者，抑或被攻擊、衝擊嘅警方，都要多得一直喺背後煽風點火嘅違法佔領發起人，陳健民而家仲敢攞番呢啲事嚟講，會唔會無恥咗啲呢？當梁振英等人成立組織、做國際人道救援都要畀人攻訐嘅時候，囍雨真係想講，盲反派班人連其他人做善事都可以攻訐一番，果然係政治立場先行、「屁股指揮腦袋」嘅最佳典範！

原圖：RTHK