近期港府計劃修訂《逃犯條例》應對有人疑在台灣殺人潛逃回港嘅問題，適逢中央近日又公布大灣區規劃嘅綱要，盲反派可以話係開盡Turbo去抹黑港府甚至中央，唔同嘅攻訐言論可以話係「此起彼落」。今日囍雨睇新聞，就見到盲反派元老、資深大律師李柱銘亦發功，話政府修例好大問題，《生果報》甚至以〈李柱銘：一國兩制已過去〉為題，講到「一國兩制」玩完咁款。老實講，李柱銘等盲反派多年不斷「反中亂港」、「亂噏廿四」，呢啲係「一國兩制」保護下嘅言論自由權利，李柱銘等盲反派日夜攻訐，依然言論免責，正好就係「一國兩制」健全嘅一大佐證。

一國兩制有問題嗎？

就咁睇《生果報》標題，囍雨都唔知係李柱銘話「一國兩制」玩完，定係《生果報》自己演繹李柱銘嘅講法，所以囍雨都係原文引用《生果報》寫乜穩陣啲，據報道，當李柱銘談到近期修訂《逃犯條例》一事時，佢認為修例一旦成功，對於「一國兩制」嘅影響嚴重，稱「可能已經同特區簽咗約嘅國家會重新考慮，擔心香港會唔會將某個國家嘅犯交比內地，呢個係一個大問題」。換句話講，李柱銘同其他盲反派一樣，將政府修例同「一國兩制」健全與否劃上等號。

如果係常人或者一般盲反派政客提出質疑，大家當佢哋唔了解修例，都仲講得通，但李柱銘作為「極資深」嘅資深大律師，佢應該知道政府唔係隨便修完例就可以「隨意」移交逃犯或者疑犯，而係特首決定啟動移交程序後，最後會唔會移交逃犯或疑犯，係有行《普通法》、尊重人權嘅香港法庭做把關架喎，李柱銘唔會覺得香港法庭會處理不公呀？

盲反派的「盲點」

無論係李柱銘好，抑或其他盲反派人士都好，基本上佢哋都有一個盲點，就係無乜提出過如果有人喺內地犯上嚴重罪行又潛逃咗番香港，香港可以點處理呢？係咪要因為「政治理由」，任由佢哋喺香港逍遙法外，令公義得唔到彰顯？可能喺盲反派眼中，佢哋所關心嘅只有「政治犯」，但香港人關心嘅，係犯下唔同罪行甚至嚴重罪行、可能會潛逃番香港嘅嫌疑犯！

司法獨立嘅法庭，都係「一國兩制」嘅重要一部分，盲反派如果連法庭都唔相信，或者喺佢哋眼中已經無「一國兩制」，不過佢哋所諗嘅，只係佢哋自己嘅想像。多年來，佢哋喺香港不停炒作、攻訐甚至幾近誹謗都相安無事，呢啲係「一國兩制」對佢哋嘅保障，佢哋就算唔認都好，呢個都係事實！

原圖：RTHK