每逢農曆新年，就係一家大小睇電影「賀歲」嘅好日子，今年廣男同家人睇過《廉政風雲煙幕》，又睇過周星馳嘅《新喜劇之王》，再諗住趁新年後嘅「悠長假期」睇近期好多人熱議嘅《流浪地球》之際，發現香港戲院原來暫時未有得睇呢套喺內地熱爆嘅電影。廣男覺得好奇怪，點解香港啲片商或者戲院，咁願意播外國電影（外國電影唔一定好睇），反而係自己國家咁Hit嘅戲，香港人仲要等呢？

非一般的中國電影

由於暫時未有機會睇到《流浪地球》，所以廣男喺唔想「上網睇」嘅情況之下，只能夠睇下佢嘅故事大綱同影評；《流浪地球》累積票房迫近內地最賣座電影《戰狼2》，故事當然係非一般，因為佢可以話係內地「絕無僅有」嘅科幻片，內容講述一班人點樣拯球地球之餘，佢並無好似其他西方電影咁下下都話係「美國人」（純粹舉例）救地球而係講全世界嘅人類團結起來，一同面對地球所面對嘅災難。

如果用電影角度睇，有啲人可能只會覺得呢套戲係中國喺科幻片入面嘅「零的突破」，但廣男就覺得電影所散發嘅訊息，一啲都唔講得笑，點解咁講？大家諗下，《流浪地球》所講嘅，唔係中國人點樣拯球世界，而係全球人類一同努力，情況就好似中國喺國際舞台上講嘅係合作、互利、共贏，而唔係好似啲西方大國咁一味「唯我獨尊」。單打獨鬥，唔可以為全球帶來出路；相反，喺全球高度一體化嘅情況，唯有合作、互諒互讓，大家先會見到出路，最明顯嘅例子，就係全球各國點樣去應對氣候問題。

用電影說故事

一套訊息咁正面嘅電影，暫時仲未喺戲院睇到（有朋友話就嚟有得睇，希望係真），實在有啲可惜，因為用電影講故事，往往係最Soft而又最有效。喺最近嘅大灣區規劃綱要，入面都寫明香港可以成為電影電視嘅博覽樞紐，如果香港可以作為中國電影嘅「跳板」，能唔能夠衝出國際都係後話，但至少可以畀香港人睇多啲自己國家嘅電影。香港人睇Marvel電影，當然開心，但有機會睇下自己國家嘅電影，可能會有另一番觀感都唔出奇。

圖片來源：新華網