香港青年喺台灣涉嫌謀殺自己女友，仲要將死者棄屍荒野之後「潛逃」香港，呢單嘢喺港台兩地造成極大迴響，好多人嘅即時反應都係「喺台灣殺完人飛番嚟香港就冇事，咁仲成世界嘅？」，特區政府見到咁大個「缺口」，所以亦建議修例，堵塞相關漏洞，但盲反派嘅反彈就極大，不斷聲稱擔心會有政治犯被移交番內地，其中「香港眾志」黃之鋒話叫台灣關注事件，話台灣人去香港都可能會被押番內地。黃之鋒講嘅嘢，係唔係合理呢？佢咁講，既貶低香港法庭，更加係侮辱港台兩地人嘅智慧！

黃之鋒扭曲概念

據傳媒報道，黃之鋒近日接受台灣「民視新聞台」訪問嘅時候，聲稱只要台灣人上網與「五毛」筆戰過，就可能涉及「顛覆國家政權罪」，在修例後到香港可能被捉走等等。根據黃之鋒嘅邏輯，即係有人喺台灣同人網上「筆戰」，如果呢個人喺修例後嚟香港，就可能被捕甚至移交到內地。

廣男唔係咩法律專家，但只要打開本《基本法》，就會見到香港特區實行原有法律同立法會制定嘅法律，香港作為《普通法》地區，有冇可能會將一個喺網上面同人「筆戰」嘅人移交番內地先？仲有，就算政府、立法會修例之後，係咪要移交一個人上內地，唔係特首「話點就點」，而係特首決定啟動移交程序，最後都係要由法庭作出審視，而涉及政治行為嘅人法律上係唔可以移交嘅，黃之鋒係咪想連獨立嘅香港法庭都想質疑先？

講到底 就是挑動矛盾

點解黃之鋒要將政府今次修例講到咁誇長，甚至講到台灣人嚟香港都「隨時出事」咁款呢？當中原因，又係想借機挑動矛盾啫，黃之鋒作為堅實嘅盲反派，由反國教開始到之後嘅違法領、「港獨」風波，基本上佢定必站在政府嘅「對面」，但喺一宗慘絕人寰嘅兇殺案面前，黃之鋒似乎都係要先為「政治服務」，盲反派呢種取態實在令人心寒！ 

原圖：Takungpao