盲反派成日話政府等唔聽意見，但奇怪嘅係，當佢哋有機會向政府甚至中央駐港機構表達意見嘅時候，佢哋竟然拒絕出席；噚日立法會舉行新春午宴，成班盲反派竟然冇一個出席，「議會陣線」議員毛孟靜仲同傳媒講，盲反派會「另起爐灶自己搞新春飯局」，話要「同聲同氣一齊食飯賀新年」咁話。立法會本來就會有唔同意見嘅議員架啦，毛孟靜等人唔肯溝通、要「同聲同氣」，咁不如佢哋自己搞個「盲反派民間議會」，一班自己人喺度圍爐取暖啦！

要表達訴求 又缺席午宴

囍雨就覺得，盲反派所謂杯葛立法會午宴根本就係鬥氣，非常幼稚，無論佢哋有幾不滿政府或者政府一啲政策都好，佢哋做得立法會議員，責任就係為選民發聲、表達訴求，如果佢哋覺得唔係同政府以至建制「同聲同氣」就缺席立法會午宴，其實佢哋喺議事廳都同建制派唔係「同聲同氣」架喎，唔通呢個就係佢哋成日唔開會嘅原因？

老實講，無論係正式、非正式宴會都好，呢個都係盲反派議員向政府表達意見嘅絕佳機會，而家佢哋意見又唔表達，甚至爛到爆嘅政治騷都唔做，好似Hea咗啲喎！其實盲反派除咗向政府官員表達訴求之外，仲有機會出席中聯辦新春午宴，不過班盲反友一樣拒絕出席，囍雨真係好懷疑，佢哋到底係唔想見中聯辦，定係自己心中有鬼！

怕被激進勢力攻擊？

點解會話班盲反派可能心中有鬼？大家諗下，計正嚟講，班盲反派一定知道參加中聯辦午宴係一個絕佳機會向中央駐港機構發達意見，但佢哋考慮嘅，仲包括如果去見中聯辦，會唔會好似以前民主黨咁，行完入中聯辦就畀班激進派係咁鬧；但囍雨覺得佢哋呢個諗法完全錯誤，因為佢哋所面向嘅，唔應該係少數嘅激進派人士，而係相當部份支持溝通、爭取民主嘅溫和派支持者，如果佢哋連溝通都唔敢，一味喺度靠攏激進派，下次投票啲溫和派選民仲邊有溫和嘅「民主派」可以支持呢？

所謂凡事兩面睇，盲反派拒絕出席立法會甚至中聯辦午宴，表面上贏咗場架，但佢哋輸咗風度，又無盡立法會議員應盡嘅責任，值得咩？

原圖：RTHK