早前《生果報》副社長陳沛敏「回信」旺角暴動罪犯盧建民，更以「野豬」精神鼓勵盧建民，畀全國政協副主席梁振英公開質疑佢表場暴徒；近日，陳沛敏回應梁振英，囍雨綜觀陳沛敏成篇文章，發現佢講咗好多嘢，不過就無正面回應到質疑，例如佢做乜要用「野豬」鼓勵盧建民。囍雨就覺得，陳沛敏以至《生果報》，根本就係一邊鼓勵、「神化」暴力抗爭，但一邊又要「遮醜」，唔敢承認自己係煽動違法！

「越講越遠」的傳媒人

綜觀陳沛敏嘅回應，囍雨就覺得佢基本上係無回應過梁振英以至其他人嘅質疑，當人哋問佢做乜要用「野豬」鼓勵暴徒，自己以至自己啲子弟又有冇學「野豬」咁勇武一下嘅時候，陳沛敏長篇大論，甚至連英國發生嘅希斯堡「人踩人」事件都講埋，但就係無答到人哋嘅問題；其實支持暴徒係一句，譴責暴徒亦都係一句，點解陳沛敏避而不談呢？

有一點囍雨覺得好有趣，就係陳沛敏攞英國希斯堡「人踩人」事件嚟講，佢可能係想借事件講出旺角暴動都應該有獨立調查委員會查下件事；但大家又要問下，如陳沛敏所言希斯堡事件入面有90幾個球迷「非法被殺」，呢件事係咪可以同無暴徒「被殺害」，反而有80多個警員受傷嘅旺角暴動相提並論呢？分析暴動成因，唔係唔得，但陳沛敏連暴徒行為孰對孰錯都唔講，一味鼓勵暴徒、迴避質疑，真係學似梁振英話齋，陳沛敏嘅回應再次證明咗佢徹頭徹尾嘅虛偽。

子女有自己的人生？

被問到會否鼓勵子弟參加暴動，陳沛敏稱子女長大有自己嘅人生，作為長輩要教導他們善良、誠實、不要講大話云云，囍雨想問下陳沛敏，咁作為「傳媒人」，又係咪應該鼓勵他人做「野豬」、違法抗爭甚至用暴力呢？由違法佔領、旺角暴動以至「港獨」風波，《生果報》都積極報道，可以話係企喺違法或者涉嫌違法者一邊，但當大家只係見到「別人嘅子女」而唔係《生果報》子弟「勇武抗爭」嘅時候，梁振英嘅質疑，其實又相當有道理喎！ 

原圖：Takungpao