戴耀廷等人嘅違法佔領案件都未審完，戴耀廷近期又走出嚟荼毒市民，喺一個分享會入面話青少年可能舉起「第二把傘」，到時參與人數會畀違法佔領更多，仲以法國「黃背心」行動為例，話「第二把傘」唔應該長期佔領，而係學法國「黃背心」咁「有進有退」，星期六、日先走出嚟抗爭。 廣男真係想講，戴耀廷擺明又靠害，推人哋啲仔女出嚟做「爛頭卒」、階下囚！

「黃背心」行動影響全社會

可能戴耀廷睇新聞見到法國「黃背心」行動持續咗咁耐，覺得香港可以「搬字過紙」，但廣男想講，「黃背心」行動所影響嘅，係全國社會嘅所有人，絕對唔可以攞嚟講笑。廣男前排去法國旅行，其中一日正正撞正係周末，即係「黃背心」人士出嚟抗爭嘅時間，喺果段日子，巴黎市內基本上係全城戒備，除咗好多警察巡邏之外，街頭亦不時有「黃背心」人士出沒，喺條街度行下都有啲驚，更加唔駛講話周圍去玩；喺一啲重要景點，睇電視又見到衝突頻頻，戴耀廷以「黃背心」行動煽動抗爭，係咪想香港每逢周末就進入「戰爭狀態」，要全港市民包括商戶一齊受害呢？

除咗市民受影響之外，「黃背心」行動更直接影響到嘅，就係執法人員同一班參與「行動」嘅青年。一班青年因為受到鼓動走上街頭，除咗喺衝突果時有機會受傷之外，佢哋犯咗法畀人拉咗，咁仲邊有前途呢？至於執法人員例如警察，要不斷受到自己國家嘅青年襲擊，時刻置於風險之中，感覺就好似每星期都有旺角暴動咁，好受咩？

戴耀廷推人子女送死

雖然戴燿廷話自己仍然主張非暴力抗爭，認為引入暴力元素，會畀到「藉口」政府；但叫得啲人出街抗爭，戴耀廷仲控制到啲人唔好用暴力咩，佢睇唔到法國「黃背心」行動有幾多暴力、縱火場面？又係果一句，如果違法佔領、旺角暴動以至「黃背心」行動係咁值得仿傚，點解大家唔會見到戴耀廷等人嘅子女出嚟「抗爭」埋一份呢？當有原因好簡單，做政治「爛頭卒」，都係搵其他人嘅子女做比較好！

原圖：Takungpao