政府建議修訂《逃犯條例》等法例，容許同香港無簽署長期安排嘅地方作一次性個案移交安排；本嚟喺香港人喺台灣被謀殺、棄屍荒野嘅情況下，義憤填膺嘅香港人都好應該支持政府修例，偏偏盲反派以打開「缺口」、怕政治犯被移交番內地為由，對政府修例諸多挑剔，其中盲反派入面嘅重量級法律界人士吳靄儀，仲聲稱自己擔心一旦修例，港人就算從未踏足內地都會被移交內地，話無23條立法都可能「被治罪」。對於吳靄儀一番說話，囍雨只能夠用靠嚇嚟形容。

無番內地照移交？

根據吳靄儀接受媒體專訪時嘅講法，話就算身處境外都可以觸犯部份內地嘅罪行，包括涉及國家安全嘅罪行，所以「將來香港人即使從不踏足大陸，都有機會被移交回內地，甚至毋須23條立法」。對於吳靄儀呢番「分析」，囍雨首先要問一句，件事係咪佢講得咁「簡單」而又恐怖先？

從常理而言，無番內地而又犯咗內地法律仲要畀香港政府移交番內地處理，聽落都有啲離奇，第一《基本法》第18條寫明香港實行香港原有法律同立法會制定嘅法律，喺香港「犯內地法」再畀政府交人上去，可能咩？第二就係而家政府建議修例係講緊啲人喺內地、台灣犯法再潛逃番香港，唔係吳靄儀講嘅果回事；吳靄儀佢作為一個咁資深嘅大律師，佢仲忽略咗一個重要事實兼誤導咗市民，就係政府建議修例後，係咪移交疑犯，係有法庭把關，唔係話政府想移交邊個番內地就即刻移交架喎！

誠如立法會議員周浩鼎所言，要移交逃犯，最終其實係法庭把關，有香港運行《普通法》制度做把關，呢個係國際認可嘅司法制度，法庭亦知道、很清楚現行法例，對於任何牽涉政治罪行、政治異見等，都唔可以作出任何移交，法庭係唔會批准嘅。所以，當吳靄儀講到可以因為陳浩天（已被取締嘅香港民族黨「召集人」）危害國家安全，「命運完全在行政機關手上」，意指陳浩天可能被「移交」到內地呢啲說法，合理咩？吳靄儀唔單止係攻擊緊特區政府，直頭連香港嘅法庭都想質疑埋！

反「一地兩檢」的翻版

尤記得盲反派之前大力反對高鐵實施「一地兩檢」，有盲反派人士聲稱市民行近西九高鐵站都可能「有危險」，畀內地人員捉走嘅說法，可謂同今日反對政府修例移交逃犯一樣，都係透過散播恐懼一方面反對政府，一方面誤導市民。但「狼來了」嘅故事聽得多，市民係咪仲會相信盲反派呢？　

圖片來源：RTHK