早前一班「港獨」派喺港大搞咗個旺角暴動三週年集會，當中唔少人都以「義士」稱呼旺角暴動嘅暴徒，美化暴行。今日，囍雨又見到「港獨」派「理論大師」練乙錚喺報章撰文，話雖然反國教、違法佔領同埋旺角暴動三波「運動」以失敗告終，但改變咗一代年輕人睇法，影響深遠。練乙錚言下之意，係咪想講香港遲早會有一場更大社會運動／暴動，令「港獨」最終得以成功呢？佢用「戊戌政變」、「辛亥革命」為引子，仲唔係想搞到香港血流成河？

不提流血衝突的惡劣後果

練乙錚寫文宣揚「港獨」，基本上都唔係咩新鮮事，話佢係不折不扣嘅「港獨」份子亦不為過。尤其喺而家「港獨」歪風幾近熄滅嘅時候，佢呢個為「港獨」派提供「論述」嘅大文膽，就梗係要寫文鼓勵下班「獨」派啦；所以，喺佢呢篇題為〈思念社運失敗後下獄的年輕人〉嘅文章，以「在香港，三波社運的種籽已經埋下，大家可能看不見。群眾四散了，但其實『低潮』不過是一種錯覺；夢想並未消失，在一個不知年的春天裏，種籽會發芽，夢就會成真」作結，意圖話畀人聽「港獨」會「夢想成真」。

雖然練乙錚篇文題目有寫關於「下獄的年輕人」，但佢篇文基本都無乜講過因為旺角暴動而付出沉重代價嘅年輕人而家喺邊或者要坐幾耐監，而係一味喺度講「戊戌政變」、「辛亥革命」等歷史。點解佢要用呢種方式煽動「港獨」？無他嘅，佢見眼前現實係「港獨」根本唔可能成功，咪唯有「以史為喻」，好自High咁叫人睇下歷史，試圖點出「港獨」只要堅持都會成功。不過，佢有一樣嘢係忽略咗嘅，就係「港獨」冇乜可能成功之餘，好多人尤其係青年先要以流血、坐監為代價！

革命未成功 青年先入獄

練乙錚篇文一方面話畀人聽搞「獨立」要和平，一方面又話畀人聽美國革命、商朝、周朝等建國都係用暴力，囍雨覺得佢無非都係想話畀人聽，就算眼前要講和平，「暴力」從歷史角度而言都非常「重要」。囍雨想問下練乙錚，既然佢唔排除甚至某程度上認同暴力嘅用處，咁下次再有青年出嚟衝甚至襲警嘅時候，佢自己會唔會「身先士卒」，落場「勇武」埋一份先？定係佢只會「打咀炮」，煽動其他人嘅子女、子侄去「勇武抗爭」？囍雨估計，練乙錚一定係後者，而且係事後走出嚟用文字佔便宜果隻。

原圖：RTHK