《時聞香港》女記者上星期五喺港大採訪旺角暴動三周年集會嘅時候，受到暴力對待同惡言驅趕，囍雨之前都寫過發生咁大件事，素來喜愛為記者發協嘅記協（香港記者協會）竟然唔出聲、唔譴責暴行；事隔幾日，記協終於發表聲明，但成個聲明就刻意將事件定調為「記者採訪時受阻」，剩係表示關注事件、呼籲尊重記者採訪權利云云。囍雨想請教一下，只要有睇過相關影片，都會睇到件事唔係「採訪受阻」咁簡單啦，記協避重就輕，係咪因為對方係「港獨」派、盲反派嘅自己友，就噤若寒蟬先？

記協聲明 言辭閃縮

根據記協擺喺自己網站發表嘅聲明，大抵意思就係話個女記者採訪時被在場人士遮擋鏡頭及推撞，事後報稱遇襲，而主辦單位就話該名女記者當時喺「非記者區位置」，有公眾阻佢拍攝，在場人士無發現有人遇襲，記協就表示「關注事件，呼籲公眾尊重記者採訪權利，傳媒在正常採訪工作不應受阻撓」。囍雨首先要問一句，記協自己有冇睇過相關影片先？

記協講到件事輕描淡寫，但只要睇過網上影片，就會睇到有人推撞個女記者、包圍佢、辱罵佢，記協如果有睇到相關影片而唔譴責暴行，係咪想包庇盲反派嘅自己友或者學生？相反，如果記協無睇過相關影片，咁佢作為一個記者組織而唔查證下事實係點，係咪做事太「求其」呢？

記協過往「勇於」譴責暴行

囍雨睇番記協以往發過嘅聲明，無論係喺違法佔領嘅時候，抑或喺旺角暴動期間，記協都有就記者受襲發表過聲明，仲「強烈」譴責過暴力行為，今次《時聞》女記者亦有指自己受襲，而大家易好容易上網睇到影片見到佢畀人推撞、辱罵，記協一句「關注事件，呼籲公眾尊重記者採訪權利 … 」，你問囍雨，囍雨就覺得係包庇自己友囉！

調番轉咁講，如果喺《生果報》記者喺採訪嘅時候有相同遭遇，囍雨相信記協就唔會單純話「關注事件」咁簡單喇！其實呢，記者或者新聞行業追求新聞自由、言論自由，當有記者因為行駛採訪權利而受到粗暴對待嘅時候，但記者組織竟然用啲咁「和諧」嘅聲明當處理咗件事，大家話呢個記者組織，「幾好」呢！

原圖：《港人講地》