廣男前幾日睇新聞，見到喺農曆新年期間，港珠澳大橋出入境人次喺大年初三達到接近16萬，創開通以來新高，唔少新聞都報道大橋口岸、巴士站以至東涌點樣「迫爆」，廣男以為大橋使用量好Full啦，但同屋企人傾計嘅時候，屋企人話平時閒日搭機場巴士去大橋口岸再過澳門，幾乎完全唔駛等；再睇番資料，有報道話大橋口岸平日車流只得三幾千架次，同預計日流量9,200至14,000架次爭好遠。廣男就喺度諗，呢種平日車流、人流少，但假日、節日就迫到爆嘅現象，係咪可以改善一下呢？

大橋過海 十分吸引

必須要強調，廣男係一個非常鍾意撘巴士、睇風景嘅人，只可惜一直都未有機會去大橋口岸「坐巴士、過大海」；見到幾單關於大橋口岸「迫爆」或者「靜到爆」嘅新聞，廣男追本溯源，發現原來而家可以通行大橋嘅港澳跨境私家車配額得幾百個，而粵港兩地車牌指標方面，亦只有一萬個入境商務車指標同一千個內地出港商務車指標。撇除每日喺大橋口岸之間穿梭嘅巴士，大橋平日使用量低嘅原因，大概就係可以通行口岸嘅車輛數目，根本不足以善用大橋本身設計所能容納嘅流量（啲跨境車牌炒到幾十萬元咁貴，相信同車牌少亦有一定關係）。

廣男就覺得，港珠澳大橋作為本港嘅重要基建，本來就應該放寬更多車輛使用，善用大橋優勢之餘，真正方便想用私家車往返港珠澳嘅人，有關方面係咪可以諗下計仔，令到更多駕車人士可以受惠呢？喺幾年前，本港運輸署推出咗「大嶼山自駕遊」計劃，畀市民網上申請大嶼山封閉道路通行嘅許可證，用私家車入梅窩等地方，每日限額為25部，咁樣既唔會好影響到大嶼山嘅交通，又可以畀市民可以用私家車入大嶼山暢遊，可謂一舉兩得，呢個方法係咪都可以套落去港珠澳大橋呢？

網上申請 使用港珠澳大橋

如果大嶼山本身封閉嘅路段可以透過網上申請、限額形式使用，廣男認為港珠澳大橋理論上都可以效法一下，例如經三地政府商討後，港府運輸署可以用網上登記制度畀香港市民申請私家車上橋，平日就放多啲車上去，假日就放少啲車上去，甚至喺節日嚴格控制車輛。如果成事的話，唔好話廣男可以坐巴士經大橋過珠海、澳門，喺周末同一家大細坐私家車嚟個Family Trip都得啦！

原圖：Takungpao