臨近農曆新年，又係盲反派借節日「籌錢」嘅大日子，早前已經「港獨」出櫃嘅「香港眾志」，今年就喺網上面推銷佢哋嘅「產品」，其中一款佢哋稱為「屬於香港人嘅第一支理念旗」，叫「100%自由」理念旗，話面對欺壓，佢哋揚起旗幟，沒有百份之一嘅退讓咁話。廣男好好奇，到底咩叫「100%自由」？係咪因為有「絕對嘅」自由，呢班「自決派」就做乜都得呢？難道有影響他人甚至違法嘅「自由」，先至稱得上自由？

自由根本沒有100%

「香港眾志」喺Facebook專頁，大力推銷佢哋所謂嘅「100%自由」理念旗，聲稱「威權時代禁言滅聲，香港人無懼堅持信念，爭取沒有禁區、沒有紅線的100%自由」，廣男想問下，到底咩叫「100%自由」呢？佢哋所謂嘅「絕對自由」，係咪包括可以宣揚「港獨」、可以衝擊、可以唔尊重宣誓條例甚至《基本法》呢？如果自由有100%，咁呢個社會咪好危險囉？由其係你班擺明想搞「港獨」嘅激進份子，如果真係「100%自由」，咁你哋掟磚又得、襲警又得、武裝革命都得喎，香港無辜市民咪好危險？

其實講到底，「香港眾志」想有「100%嘅自由」，就係想話畀其他人聽，無論佢哋衝擊政府好，宣揚「自決港獨」好，甚至入到立法會點樣宣誓都好，呢啲都係佢哋呢班年輕政客嘅自由，佢哋有權違法，政府唔可以執法，呢啲就係佢哋想要嘅自由！但大家要問一句，如果自由係佢哋所想嘅絕對概念，咁我哋嘅社會仲有秩序、法律可言嘅？

香港已經十分自由！

仲有一點，廣男唔知「香港眾志」班人係咪身在福中不知福，其實香港已經十分自由，例如根據「2018年全球人類自由指數」，香港自由度排世界第三，比起黃之鋒喜歡去膜拜的民主大國美國，仲要高出十幾位；又例如由美國傳統基金會公布嘅2019年「經濟自由度指數」，香港更加是係全球第一名。其他指數例如透明國際「清廉指數」、世界正義工程「法治指數」等，香港嘅排名都喺世界前列，當「香港眾志」想話香港冇自由或者唔夠自由嘅時候，唔該睇下啲國際組織點評價香港先啦！

自由，從來都唔係一個絕對嘅概念，當有人要行使自由權利嘅時候，自由冇可能包括影響到他人、社會秩序嘅自由，如果「香港眾志」要絕對自由，咁廣男唯有同佢哋講句，「你哋快啲番去火星啦！」

原圖：香港眾志Facebook