臨近歲晚，特別多內地客嚟香港辦年貨，其中上水等地方更可以話係特別多人流；民主黨立法會議員兼北區區議員林卓廷唔知係咪因為成日畀人話地區工作做得唔好，所以喺噚日就喺上水搞咗個反水貨遊行。不過，遊行嘅焦點，似乎就唔係單純為水貨客或者內地旅行問題表達訴求咁簡單，而係有唔少「港獨」份子混入咗遊行隊伍，將「反水貨遊行」變成「港獨」遊行咁，大家真係要問下「電話廷」（即林卓廷），佢搞咁大場大龍鳳，原來就係為咗搭台畀「港獨」份子做宣傳？

又英國旗、龍獅旗 反水客變搞「港獨」？

林卓廷話要搞反水貨遊行，廣男第一個反應就係，咁近農曆新年喺上水搞遊行，肯定會有事發生；不過廣男估唔到嘅，係遊行「出現問題」唔係因為發生衝突，而係遊行變咗有人宣揚「港獨」。根據傳媒報道，林卓廷嘅遊行隊伍有唔少「港獨」份子參與，除咗有「獨派」人士參加，隊伍入面有人高舉英國旗，甚至有人舉起代表「港獨」的「龍獅旗」（據報「學獨聯」人士原本也打算參加遊行）！遊行結束後，一班「獨派」人士又到上水港鐵站另一邊滋事，加入其他「獨派」嘅行動。廣男見到呢個情況，真係要林卓廷一句，佢咁「出力」搭台，原來係想借機宣揚「港獨」？

對於反水貨遊行好似變成「港獨」遊行咁，廣男覺得林卓廷絕對責無旁貸，如果有「港獨」份子參加遊行隊伍，如果林卓廷唔係支持「港獨」，點解又要畀呢班人參加呢？嗱，唔好話佢冇權阻人參加遊行呀，佢作為主辦單位，絕對有權話大家理念唔同，唔該唔好死跟；就算班「港獨」份子係都要加入，林卓廷亦大可事先宣佈，自己個遊行同班「港獨」份子無關！唔信？大家記唔記得呀？之前盲反派搞元旦遊行，有團體想加入遊行隊伍，民陣都拒絕其他團隊參加遊行，點解林卓廷今次又無咁做？呢件事真係相當有可疑！

林卓廷要講清講楚

對於反水貨遊行變咗個別「港獨」份子借機宣傳一事，廣男當然唔可以因此而把林卓廷歸類為「港獨」派；但面對有指控話民主黨同「獨派」合流，廣男就覺得無論係民主黨好、林卓廷好，都應該交代清楚到底發生咩事，係佢哋同「港獨」派合作？定係啲人嚟參加遊行佢哋阻止唔到呢？如果民主黨不作回應，人哋話佢哋同「獨派」合流，又真係唔係無道理！

至於水貨客問題，廣男又係同一個質疑，林卓廷2015年當選為北區區議員，到而家2019年先咁高調「反水貨」，大家要問下佢，係咪到選舉年佢先識蒲頭呢？答案其實都呼之欲出啦！

原圖：RTHK