香港各間大學嘅學生會，老實講，早就畀「本土派」、「港獨派」攻陷咗，班所謂嘅學生代表自己聚埋「圍威喂」，完全唔理個世界發生緊乜事，最終令到所謂嘅學生組織同社會愈來愈脫節，完全代表唔到大部份學生嘅立場同利益。最近，浸大學生會評議會改選，幾名普選評議員候選人爭相表達自己係「港獨派」之餘，個別候選人仲徹底表達出自己「雙重標準」、「假民主」嘅特質，大家話吖，呢啲咁嘅人做學生代表，呢個學生會仲有咩前途可言吖！

大學學生會早失意義

囍雨對出嚟參加學生組織嘅所謂學生代表支持「港獨」、「自決」，老實講，都真係見怪不怪。冇計架喎，各大學學生會嘅投票率長期偏低、啲職位空缺又長期唔夠人參選，來來去去都只係吸引到一班所謂「港獨」友、「自決」友出嚟選，學生會成為小眾玩意，班人日日圍爐取暖，點會唔搞到走火入魔，全部「港獨」上腦吖。

嗱，囍雨唔係亂鬧架，今日就有報道話，浸大學生會評議會舉行週年諮詢大會，幾名普選評議員公開接受提問，除咗急不及待表露「獨」相外，其中一名候選人周頌天，口口聲聲話支持「民族自決」，但當問到若果最終得出「一國一制」結果時，呢位小朋友竟然隨即變臉，話「一國一制」唔屬於自決選項，即使係大部份市民意願佢亦絕不接受。除咗搞「港獨」、「自決」，呢啲咁嘅未來學生代表原來連自己成日掛喺口邊嘅「民主」亦都唔識，香港各大學生會代表質素有幾低，單睇浸大亦可見一斑。

口裡自決 實則霸權

先唔好講香港根本冇可能、冇資格自行決定香港嘅政治前途，但講「自決」呢樣嘢，原來只要「自決」得出嚟嘅結果同呢啲學生代表心中理想唔一樣，呢啲咁嘅所謂經民主程序產生嘅民意代表，原來都唔會接受。唓，乜都你班人講晒啦，口就話係「自決」，原來只係用「自決」去包裝「霸權」，講到底你班人都係要「港獨」，只要唔係「港獨」就絕不接受！真係好討厭囉，呢班人仲有咩資格學生講「民主」呀？算把啦！

正正因為有呢啲咁霸道嘅人存在，香港各間大學學生會先至會成為小眾玩意；好似早幾日港大學生會咁，班候選人立場只係溫和啲同埋「反港獨」咋，即刻畀班已經上晒腦嘅「港獨」派、「自決」友圍攻同怒擠，喺呢種情況下，真正知道個世界發生緊咩事、知道乜叫做大局嘅學生，試問又點會走出嚟參選吖。唔少人對呢種情況感到擔心，但囍雨又真心覺得冇乜所謂喎，若然班所謂學生代表仲係唔清醒嘅話，遲早就畀社會淘汰架啦，有咩所謂喎。

圖片來源：52hkbusupecc no.1 Facebook