政府向市民派發4000元，唔少政黨都義務幫街坊填表，其中有建制派政黨喺幫市民填表同時，亦清楚標示會收集個人資料作聯絡同提供資訊用途，跟足法例要求去做，但竟然引起盲反派批評。但係喺另一邊廂，原來盲反派都不時藉唔同活動收集市民聯絡資料，疑似「只許州官放火」，其中「自決派」立法會員區諾軒喺上年做地區問卷時，同樣有收集個人資料，當中仲表明收集目的包括「就選舉進行宣傳」，區諾軒回覆媒體嘅時候就話，自己同建制派收集嘅資料唔同，建制派「連借錢都可以幫佢搞埋」。言下之意，即係話建制派做就犯法，盲反派做就天經地義，呢個係乜嘢邏輯呀？

「老屈」建制派？

嗱，根據區諾軒嘅講法，佢話建制派收集埋人哋身份證副本等資料，「連借錢都可以幫佢搞埋」，即係暗示建制派做咗犯法嘢啦！佢作出呢啲指控，請問有冇證據？囍雨睇番涉事建制派政黨嘅收集資料聲明，上面講到明資料喺用嚟「與本人聯繫及提供資訊(包括提供貨品、設施活動或服務訊息，研究調查或其他直接有關的活動等)」，即係話收集到嘅資料，全部只係用嚟做聯絡或者提供資料。區諾軒講到建制派攞啲資料可以用嚟做犯法嘢，貫徹盲反派一味玩「扣帽子」、將啲嘢推到極端嘅「老屈」作風！

至於區諾軒嘅收集個人資料聲明，入面就講到明除咗資料用於日常聯繫，仲講明「就選舉進行宣傳」，即係做地區問卷嘅時候，原來仲可能拎你啲聯絡資料做選舉宣傳；咁都仲唔止喎，佢呢個「光明正大」嘅收集資料聲明，寫明收集市民個人資料「主要用於（但不限於以下用途）」，套用區諾軒嘅邏輯，大家係咪又可以話區諾軒講到明資料用途「不受限」，係咪佢可以攞市民啲資料去賣、「連借錢都可以幫佢搞埋」都得？

收集資料對否 視乎用途

老實講，其實好多議員、地區人士喺提供服務畀街坊嘅時候，都會收集街坊嘅個人資料，只要係正當地使用同保存呢啲資料，例如係有活動、資訊先通知番街坊，事先又得到街坊同意，囍雨就覺得絕對冇問題。建制派今次收集資料畀人係咁攻，原因好簡單，咪就係因為佢哋係建制派囉。調番轉咁講，如果盲反派人士講到人哋咁有問題，咁佢哋下次搞活動、派嘢等等，記住唔好收集市民資料，唔好「有口話人，無口話自己」呀！聽到未呀，區諾軒！

圖片來源：RTHK